సుప్రీమ్ హీరో సాయిధరమ్ తేజ్ తమ్ముడు వైష్ణవ్ తేజ్ హీరోగా పరిచయం అవుతున్న సంగతి తెలిసిందే. లెక్కల మాస్టారు సుకుమార్ సొంత నిర్మాణ సంస్థ అయిన ‘సుకుమార్ రైటింగ్స్’ మరియు ‘మైత్రీ మూవీ మేకర్స్’ సంస్థల పై ఈ చిత్రం రూపొందుతుంది. ‘రంగస్థలం’ చిత్రానికి సుకుమార్ దగ్గర అసిస్టెంట్ డైరెక్టర్ గా పనిచేసిన బుచ్చిబాబు సానా ఈ చిత్రం ద్వారా దర్శకుడిగా పరిచయమవుతున్నాడు. ఈ చిత్రానికి ‘ఉప్పెన’ అనే టైటిల్ ను ఫిక్స్ చేసినట్టు సమాచారం. ఇప్పటికే విడుదల చేసిన వైష్ణవ్ తేజ్ ప్రీ లుక్ అందరినీ ఆకట్టుకుంది.
వైష్ణవ తేజ్ జాలరి గెటప్ లో వున్న ఈ లుక్ సినిమా పై అంచనాలను పెంచింది. ఇక ఈ చిత్రంలో వైష్ణవతేజ్ సరసన హీరోయిన్ గా మంగుళూరు భామ కృతి శెట్టి ని ఎంపికచేసినట్టు టాక్ వినిపిస్తుంది. ఇంతకు ముందు కృతి శెట్టి పలు తమిళ మూవీస్ తో పాటూ ఓ కన్నడ చిత్రంలో కూడా నటించింది. ఇక కోలీవుడ్ క్రేజీ హీరో విజయ్ సేతుపతి కూడా ఈ చిత్రంలో నటిస్తుండడంతో ఈ చిత్రం పై అంచనాలు మరింత పెరిగాయి. ఇక ఈ చిత్రం రెగ్యులర్ షూటింగ్ మే 25 నుండీ ప్రారంభం కానుందట. రాక్స్టార్ దేవిశ్రీప్రసాద్ ఈ చిత్రానికి సంగీతం అందిస్తుండడం విశేషం.
