కోలీవుడ్ హిట్ డైరెక్టర్ తో రామ్ చరణ్..?

January 4, 2021 / 02:43 PM IST

Join Us

సౌత్ ఇండియాలో మోస్ట్ వాంటెడ్ డైరెక్టర్ గా మారాడు లోకేష్ కనగరాజ్. ‘నగరం’ అనే సినిమాతో దర్శకుడిగా పరిచయమైన లోకేష్.. రెండో సినిమాగా ‘ఖైదీ’ తెరకెక్కించి భారీ సక్సెస్ ను అందుకున్నాడు. ఈ సినిమా లోకేష్ ని టాప్ డైరెక్టర్ గా మార్చేసింది. ఈ సినిమా హిట్ అవ్వడంతో కోలీవుడ్ స్టార్ హీరో విజయ్ ని డైరెక్ట్ చేసే ఛాన్స్ దక్కించుకున్నాడు. వీరి కాంబినేషన్ లో తెరకెక్కిన ‘మాస్టర్’ సినిమాపై భారీ అంచనాలు నెలకొన్నాయి. సంక్రాంతి కానుకగా రానున్న ఈ సినిమా బ్లాక్ బస్టర్ అవుతుందని ఆశిస్తున్నారు.

ఈ సినిమా ఇంకా విడుదల కాకముందే కమల్ హాసన్ తో ‘విక్రమ్’ అనే సినిమాను మొదలుపెట్టాడు లోకేష్. కొద్దిరోజుల క్రితం విడుదల చేసిన ‘విక్రమ్’ టీజర్ కూడా ఓ రేంజ్ లో ఉండడంతో లోకేష్ డిమాండ్ పెరిగిపోయింది. త్వరలోనే ఈ డైరెక్టర్ తెలుగులోకి కూడా ఎంట్రీ ఇవ్వబోతున్నారని ప్రచారం జరుగుతోంది. మైత్రి మూవీ మేకర్స్ సంస్థ లోకేష్ కి అడ్వాన్స్ ఇచ్చినట్లు వార్తలు వచ్చాయి. కానీ హీరో ఎవరనేది క్లారిటీ లేదు. అయితే ఇటీవల లోకేష్.. రామ్ చరణ్ కి కథ చెప్పినట్లు తెలుస్తోంది.

ఈ విషయాన్ని లోకేష్ ‘మాస్టర్’ సినిమా ప్రమోషన్స్ లో భాగంగా ఓ ఇంటర్వ్యూలో వెల్లడించారు. రామ్ చరణ్ తో సినిమా చేస్తారని ప్రచారం జరుగుతోంది.. అందులో నిజమెంత..? అని ప్రశ్నించగా.. చర్చలు జరిగిన మాట నిజమే అని.. అయితే ఒక సినిమా చేస్తున్న సమయంలో మరో సినిమా చేయలేను కాబట్టి ప్రస్తుతం కమల్ హాసన్ తో సినిమా చేస్తున్నట్లు.. ఇది పూర్తయిన తరువాత చరణ్ ప్రాజెక్ట్ సంగతి చూస్తానని లోకేష్ చెప్పుకొచ్చారు. ఈ సినిమా ఎప్పుడు తెరకెక్కుతుందో తెలియదు కానీ ఈ కాంబినేషన్ లో సినిమా రావడం మాత్రం పక్కా అని తెలుస్తోంది.