అభినేత్రి సావిత్రి జీవితం ఆధారంగా నాగ్ అశ్విన్ తెరకెక్కించిన సినిమా మహానటి. సావిత్రి పాత్రలో కీర్తి సురేష్ నటించిన ఈ మూవీ మే 9 న రిలీజ్ అవుతోంది. సినిమాల వారం శుక్రవారం. ఏ సినిమా అయినా అప్పుడే థియేటర్లోకి వస్తుంది. అదే రోజు మరో భారీ చిత్రం వస్తున్నా.. ముందు రోజు పండుగ ఉన్నా.. గురువారం రిలీజ్ చేస్తుంటారు. గురువారం, శుక్రవారం కాకుండా మహానటి బుధవారం రిలీజ్ అవుతోంది. ఎందుకు ఇలా రిలీజ్ చేస్తున్నారని నిర్మాతలను స్వప్న దత్, ప్రియాంక దత్ లను అడగగా వారు ఇలా సమాధానం చెప్పారు. తమ తండ్రి అశ్వినీదత్ సలహా మేరకు ఆరోజు రిలీజ్ చేస్తున్నామని వెల్లడించారు.
“మా వైజయంతి మూవీస్ బ్యానర్ లో మెగాస్టార్ చిరంజీవి హీరోగా 1990లో నిర్మితమైన ‘జగదేకవీరుడు అతిలోకసుందరి’ సినిమా మే 9వ తేదీనే విడుదలై ఘన విజయాన్ని అందుకుంది. ఆ సెంటిమెంట్ ప్రకారమే ఆ తేదీని రిలీజ్ చేయమని మా నాన్న చెప్పారు” అని వివరించారు. మహానటిలో క్యూట్ బ్యూటీ సమంత జర్నలిస్ట్ గా సావిత్రి జీవితాన్ని మనకి చూపించనుంది. మాలీవుడ్ స్టార్ హీరో దుల్కర్ సల్మాన్, సావిత్రి భర్త జెమినీ గణేశన్ పాత్రలో కనిపించనున్నారు. మిక్కీ జె మేయర్ స్వరపరిచిన పాటలు అందరినీ ఆకట్టుకుంటున్నాయి. సినిమా కూడా అందరి మనసులు గెలుచుకుంటుందని చిత్ర బృందం ఆశిస్తోంది.
