సూపర్ స్టార్ కృష్ణ గారు మరణించి అప్పుడే వారం రోజులు కావస్తున్నా.. ఆయన కుటుంబ సభ్యులు, వీరాభిమానులు, తెలుగు చలనచిత్ర పరిశ్రమ వర్గాలవారు, సన్నిహితులు, శ్రేయోభిలాషులు ఆ విషయాన్ని ఇంకా నమ్మలేకపోతున్నారు. నవంబర్ 15 తెల్లవారు జామున అందర్నీ శోకసంద్రంలో ముంచేసి తిరిగి రాని లోకాలకు తరలి వెళ్లిపోయారాయన. మూడవ రోజు సినీ ప్రముఖులతో కలిసి కృష్ణ చిన్నకర్మ కార్యక్రమాన్ని ఘనంగా నిర్వహించారు కుటుంబ సభ్యులు. కాగా నేడు (నవంబర్ 21) తండ్రి అస్థికలను కృష్ణానదిలో నిమజ్జనం చేయడానికి ఆయన తనయుడు మహేష్ బాబు మరికొంత మంది ఫ్యామిలీ మెంబర్స్తో కలిసి విజయవాడకు వెళ్లారు.
హైదరాబాద్ నుండి ప్రత్యేక విమానంలో బయలుదేరిన మహేష్ గన్నవరం ఎయిర్ పోర్టు నుండి రోడ్డు మార్గం ద్వారా ఉండవల్లి చేరుకున్నారు. ఇందుకోసం అక్కడి ధర్మ నిలయంలో శాస్త్రోక్తంగా పూజాదికాలు జరుగుతున్నాయి. తండ్రి అస్థికల్ని శాస్త్రోక్తంగా ఇక్కడ నిమజ్జనం చేయనున్నారు మహేష్. మహేష్ విజయవాడ రానున్నారనే వార్త తెలుసుకున్న అభిమానులు.. ఈ కష్టసమయంలో తమ అభిమాన నటుడికి అండగా నిలబడడం అనేది తమ వంతు బాధ్యతగా భావించి.. ఉదయాన్నే కృష్ణ చిత్ర పటాలు చేతపట్టుకుని భారీగా బైక్ ర్యాలీ చేపట్టారు.
మహేష్ ప్రయాణించే దారిలో కొంతమేర ట్రాఫిక్ జామ్ అయ్యింది. తనతో పాటు బాబాయ్ ఆదిశేష గిరి రావు, బావలు సంజయ్ స్వరూప్, సుధీర్ బాబు, దర్శకులు త్రివిక్రమ్, మెహర్ రమేష్, నిర్మాత సూర్యదేవర నాగవంశీ తదితరులు ఉన్నారు. మహేష్ సోదరుడు రమేష్ బాబు తనయుడు ఘట్టమనేని జయకృష్ణ ఆదివారం (నవంబర్ 20) తాత స్వగ్రామం బుర్రిపాలెం చేరుకున్నాడు. అక్కడ బంధుమిత్రులు, అభిమానులు ఘనస్వాగతం పలికారు. కృష్ణ మరణంతో బుర్రిపాలెంలో విషాద చాయలు అలుముకున్నాయి.
మహేష్ అక్కడ సంస్మరణ సభ ఏర్పాటు చేయనున్నారు. అలాగే నవంబర్ 27న హైదరాబాద్, ఫిలింనగర్లోని జేఆర్సీ కన్వెన్షన్లో దశదిన కర్మ ఏర్పాటు చేయబోతున్నారు. ప్రస్తుతం మహేష్ విజయవాడ చేరుకున్న విజువల్స్, ఫ్యాన్స్ ర్యాలీ చేస్తున్న వీడియోలు నెట్టింట బాగా వైరల్ అవుతున్నాయి.
ఆహ నా పెళ్లంట వెబ్ సిరీస్ రివ్యూ& రేటింగ్!
గాలోడు సినిమా రివ్యూ & రేటింగ్!
మసూద సినిమా రివ్యూ & రేటింగ్!
సూపర్ స్టార్ కృష్ణ ట్రెండ్ సెట్టర్ అనడానికి 10 కారణాలు!
