దసరా.. సంక్రాంతి పండగల్లో మహేష్ సందడి..!

దసరా పండక్కి గట్టిగా ఓ నెల రోజుల వ్యవధి కూడా లేదు. మరోవైపు దసరా సీజన్ సినిమాలతో థియేటర్లన్నీ ఇప్పటికే ఫుల్ అయిపోయాయి. మరి ఇదేంటి అనుకునేరు. అలా అని ఈ సందడి ఫస్ట్ లుక్, టీజర్ లాంటి వాటితో అనుకోడానికి అంతకంటే వీల్లేదు. అచ్చంగా ఇది సినిమాల విడుదలకి సంబంధించిన కబురే. అయితే ఈ ఏడాది కాదు వచ్చే ఏడాది నాటి మాట ఇది.ప్రస్తుతం మురుగదాస్ దర్శకత్వంలో నటిస్తోన్న మహేష్ తర్వాతి సినిమాల కథలను లాక్ చేసిన సంగతి తెలిసిందే. అయితే కథలు మాత్రమే కాకుండా విడుదల విషయాలు సహా వాటి ప్లాన్ మొత్తం సిద్ధం అయిందట.

మురుగదాస్ సినిమా జనవరి నాటికి పూర్తవగానే ఫిబ్రవరి నుండి కొరటాల కలయికలో మరో సినిమా చేస్తోన్న మహేష్ ఆ సినిమాని 2017 దసరాకి తెరమీదికి తీసుకురావాలని నిశ్చయించుకున్నారట. మరోవైపు వక్కంతం వంశీ సినిమాని కొరటాల సినిమాతోనే సమాంతరంగా సెట్స్ మీదికి తీసుకెళ్లాలని ఆలోచిస్తున్నారట. ఇదే జరిగితే ఒకేసారి రెండు సినిమాల్లో మహేశ్ నటించడం ఇదే తొలిసారి అవుతుంది. పీవీపీ సంస్థ నిర్మించనున్న ఈ సినిమా సంక్రాంతికి విడుదల చేయనున్నారట. ఈ ప్లాన్ సక్రమంగా అమలైతే అభిమానుల పండగ సంబరాలు రెట్టింపవడం ఖాయం.