సూపర్ స్టార్ మహేష్ బాబు, కొరటాల శివ కాంబినేషన్లో వచ్చిన శ్రీమంతుడు ఇండస్ట్రీ హిట్ గా నిలిచింది. మళ్లీ వీరి కలయికలో ఓ సినిమా తెరకెక్కనుంది. “భరత్ అను నేను” టైటిల్ అనుకుంటున్న ఈ మూవీ నేడే (బుధవారం) రామానాయుడు స్టూడియోలో పూజా కార్యక్రమాలు జరుపుకోనుంది. ప్రముఖ నిర్మాత డీవీవీ దానయ్య నిర్మిస్తున్న ఈ చిత్రానికి సంబంధించిన కొన్ని విషయాలు బయటికి వచ్చాయి. ఇందులో సూపర్ స్టార్ ముఖ్యమంత్రిగా నటిస్తారని, ఈ సినిమా కథ మహా భారతంలోని కొన్ని కీలక ఘట్టాలను ఆధారం చేసుకొని అల్లుకున్నదని తెలిసింది.
శివ గత చిత్రాల మాదిరిగానే ఇందుకు కూడా రాక్ స్టార్ దేవీ శ్రీ ప్రసాద్ సంగీత మందిస్తున్నారు. జనవరి నుంచి రెగ్యులర్ షూటింగ్ జరుపుకోనున్న ఈ మూవీపై భారీ అంచనాలున్నాయి. ప్రస్తుతం మహేష్ బాబు ఏ.ఆర్. మురుగ దాస్ దర్శకత్వంలో యాక్షన్ థ్రిల్లర్ మూవీ చేస్తున్నారు. ఏకకాలంలో తెలుగు, తమిళ భాషల్లో నిర్మితమవుతున్న ఈ సినిమా షూటింగ్ ని డిసెంబర్ నాటికీ కంప్లీట్ చేయాలని మహేష్ శ్రమిస్తున్నారు. దీని తర్వాత కొరటాల దర్శకత్వంలో పనిచేయనున్నారు.
