ఛత్రపతి శివాజీ పాత్రలో మహేష్ బాబు నటించాలి

తెలుగు చిత్ర పరిశ్రమలో ప్రముఖ రచయితగా పేరొందిన పరుచూరి గోపాలకృష్ణ సూపర్ స్టార్ మహేష్ బాబు గురించి కొన్ని ఆసక్తికర సంగతులు చెప్పారు. ఓ ఇంటర్వ్యూ లో ఆయన మాట్లాడుతూ “చిరునవ్వుతో సామ్రాజ్యాన్ని జయించగల ధీశాలి మహేష్ బాబు. ఆయన్ని చూడగానే నాకొకటి అనిపిస్తుంది. అసలెవరికైనా ఇతనిపై కోపం వస్తుందా? ఎందుకంటే ఆయన చిరునవ్వుని చూసిన పరమశివుడైనా చల్లబడాల్సిందే. అంత అద్భుతంగా ఉంటుంది అతని చిరునవ్వు.” అని అన్నారు.

ఇక తన కోరికను వివరిస్తూ ” అల్లూరి సీతారామరాజుగా కృష్ణగారు నటించారు. ఆయన నటించాలని ఎంతగానో కోరుకున్న ‘ఛత్రపతి శివాజీ’ పాత్ర అలాగే ఉంది. ఆ పాత్ర మహేష్‌బాబు చేస్తే అద్భుతంగా ఉంటుంది. ఎందుకంటే కృష్ణగారిలా మహేష్ కూడా ఆ పాత్రకి అతికినట్లుగా ఉంటాడు. కృష్ణగారికి ‘అల్లూరి’ పాత్రతో ఎంత క్రేజ్ వచ్చిందో, మహేష్‌కి అంతటి పేరు తెస్తుంది శివాజీ పాత్ర. శివాజీ పాత్రను మహేష్‌బాబు వేస్తే చూడాలని ఉంది.” అని పరుచూరి గోపాలకృష్ణ వివరించారు. ఆ కథను రాజమౌళి తెరకెక్కిస్తే మరింత అద్భుతంగా ఉంటుంది. మరి ఈ ప్రాజక్ట్ ఎప్పుడు రూపం దాల్చుతుందో చూడాలి.