ఎట్టకేలకు మెగా ముహూర్తం కుదిరింది!

మెగా అభిమానులందరూ ఎప్పుడెప్పుడా అని ఎన్నో ఏళ్ళుగా, ఎంతో ఆత్రంగా ఎదురుచూస్తున్న మెగాస్టార్ 151వ చిత్రానికి ముహూర్తం కుదిరింది. కొన్ని కోట్ల మంది ఆశగా ఎదురుచూస్తున్న మెగా ముహూర్తం ఏప్రిల్ 29 అనగా శుక్రవారం మధ్యాహ్నం 1.30 గంటలకు ఫిక్సయ్యింది.

చిరు తనయుడు రామ్ చరణ్ నిర్మాతగా, వివి.వినాయక్ దర్శకత్వంలో అత్యంత ఘనంగా హైద్రాబాద్ లోని జూబ్లీ హిల్స్ లోని రామ్ చరణ్ ఆఫీస్ లో పరిమిత అతిధులు మరియు సినిమా యూనిట్ సమక్షంలో పూజా కార్యక్రమాలతో సినిమా లాంఛనంగా ప్రారంభమవ్వనుంది. తమిళ సూపర్ హిట్ చిత్రం “కత్తి” రీమేక్ గా తెరకెక్కనున్న మెగా 151వ చిత్రంలో చిరంజీవి సరసన నయనతార కథానాయికగా నటించనున్నట్లు ఇప్పటికే వార్తలు వస్తున్నప్పటికీ.. 29వ అందుకు సంబందించి అఫీషియల్ కన్ఫర్మేషన్ ఇవ్వనున్నారు.

మెగా రీఎంట్రీ ముహూర్తం ఫిక్సవ్వడంతో.. మెగా అభిమానుల లోగిళ్ళలో ఇప్పట్నుంచే పండగా హడావుడి మొదలైంది. ఏప్రిల్ 29న కొంత మంది చిరు అభిమానులు భారీ సంఖ్యలో బైక్ ర్యాలీ నిర్వహించనున్నట్లు సమాచారం అందుతోంది.
మెగాస్టార్ రీఎంట్రీకి సంతోషిస్తూ ఇప్పట్నుంచే యువ కథానాయకులు మరియు నాయికలు తమ సోషల్ నెట్వర్కింగ్ సైట్లలో #mega151 అంటు హ్యాష్ ట్యాగ్ తో పోస్ట్ పెడుతూ తమ అభిమానాన్ని చాటుతున్నారు!