టాలీవుడ్ హాటెస్ట్ లవ్ బర్డ్స్ సమంత, నాగ చైతన్య. కింగ్ నాగార్జున తమ ఇంటి పెద్ద కోడలు సమంత అని చెప్పడంతో సస్పెన్స్ కి తెర పడింది. వచ్చే ఏడాది పెళ్లి పీఠలపై కూర్చోనున్న వీరిద్దరూ కలిసి ఓ సినిమా చేసేందుకు సన్నాహాలు జరుగుతున్నాయి. ప్రముఖ రచయిత చేతన్ భగత్ నవల ఆధారంగా బాలీవుడ్లో తెరకెక్కిన ‘టు స్టేట్స్’ సినిమాను తెలుగులో రీమేక్ చేయడానికి యువ డైరక్టర్ వెంకట్ కుంచెమ్ ప్రయత్నిస్తున్నారు.
ఇతను మాస్ డైరక్టర్ వివి వినాయక్ వద్ద అనేక చిత్రాలకు కో డైరెక్టర్గా వ్యవహరించారు. ఈ రీమేక్ ద్వారా డైరక్టర్ గా పరిచయం కానున్నారు. ఈ చిత్రం దాదాపు వీవీ వినాయక్ పర్యవేక్షణలోనే తెరకెక్కనున్నట్లు సమాచారం. ‘ఏ మాయ చేసావే’ సినిమాతో చైతూ, స్యామ్ హీరో హీరోయిన్లుగా తొలిసారి కలిసి నటించారు. ఆ తర్వాత ఈ జోడీ, ‘ఆటోనగర్ సూర్య’, ‘మనం’ చిత్రాల్లో ఆకట్టుకున్నారు. ఆ సినిమాలు రిలీజ్ అయినప్పుడు వీరిద్దరూ ప్రేమికులని ఎవరికీ తెలియదు. లవ్ బర్డ్స్ గా లోకానికి తెలిసి తర్వాత చేస్తున్న మూవీ కావడంతో కొత్త చిత్రంపై భారీ అంచనాలు ఏర్పడ్డాయి. అభిషేక్ పిక్చర్స్ సంస్థ నిర్మించనున్న ఈ ఫిల్మ్ పూర్తి వివరాలు త్వరలోనే వెల్లడి కానున్నాయి.
