వివాహానంతరం కొంతమంది నటీమణులు చిత్ర పరిశ్రమలోనికి పున: ప్రవేశిస్తున్న సంగతి చూస్తున్నదే. పెళ్లికి ముందు నటిగా సుదీర్ఘమైన కెరీర్‌ను కొనసాగించిన నమిత.. తెలుగు, తమిళంలో అనేక సినిమాలలో నటించారు. ముఖ్యంగా తమిళనాట ఆమెకు మంచి క్రేజ్‌ కూడా ఉండేది. అయితే రాను రాను అవకాశాలు సన్నగిల్లడంతో ప్రేమించన వ్యక్తిని పెళ్లి చేసుకొని సైలెంట్ అయిపోయింది. ఇప్పుడిప్పుడే కాస్త స్థిమితపడిన తర్వాత చాలామంది తారల కోవలోనే రీఎంట్రీ ఇవ్వబోతున్నారు. బరువు పెరగడం వల్ల కూడా తనకు అవకాశాలు సన్నగిల్లాయని భావించిన ఆమె ఇప్పుడు బరువు తగ్గే పనిపై కూడా దృష్టి పెట్టిందని అంటున్నారు. అందులో భాగంగానే కసరత్తులు చేసి.. బరువు తగ్గిన ఆమె కాస్త స్లిమ్‌ అయ్యారు.
తాజా సమాచారం మేరకు.. కె.ఎస్.రవికుమార్ దర్శకత్వంలో బాలయ్య హీరోగా రూపొందనున్న చిత్రంలో నమిత నెగిటివ్ రోల్లో కనిపించనుందని తెలుస్తోంది. “సింహా” సినిమాలో బాలయ్యతో కలిసి ఒక స్పెషల్ సాంగ్ లో మెరవడమే కాక ఆ సినిమాలో సెక్సీ లెక్చరర్ గానూ ఆకట్టుకొంది నమిత. మళ్ళీ బాలయ్య సినిమాతో రీఎంట్రీ ఇవ్వనున్న నమిత మరి సెటిల్ అవ్వగలుగుతుందో లేదో చూడాలి.
