Nandamuri Balakrishna : బాలకృష్ణ హెల్త్ బులిటెన్ విడుదల… డాక్టర్లు ఎం చెప్పారంటే ?

July 22, 2026 / 06:12 PM ISTByFilmy Focus Desk

Join Us

నటసింహ నందమూరి బాలకృష్ణ ప్రస్తుతం నటిస్తున్న ‘NBK 111’ సినిమా షూటింగ్ సందర్భంగా జరిగిన ప్రమాదం అభిమానుల్లో ఆందోళన కలిగించింది. యాక్షన్ సన్నివేశాల చిత్రీకరణలో భాగంగా ఆయనకు గాయం కావడంతో వెంటనే వైద్య చికిత్స కోసం ఆస్పత్రికి తరలించిన విషయం తెలిసిందే. ఈ ఘటన తర్వాత బాలయ్య ఆరోగ్య పరిస్థితిపై పలు రకాల వార్తలు సోషల్ మీడియాలో వైరల్ కావడంతో, చికిత్స అందిస్తున్న వైద్య బృందం అధికారిక హెల్త్ బులెటిన్ విడుదల చేసింది.

Nandamuri Balakrishna

వైద్యుల ప్రకారం, బాలకృష్ణ ఎడమ మోకాలికి సంబంధించిన పరీక్షలు నిర్వహించగా, మోకాలి చుట్టూ ఉన్న కణజాలాల్లో రక్తం గడ్డకట్టడం, వాపు కనిపించినట్లు గుర్తించారు. ఈ లక్షణాలు కండరాల గాయాన్ని సూచిస్తున్నాయని తెలిపారు. ప్రస్తుతం ఆర్థోపెడిక్ నిపుణుల పర్యవేక్షణలో మరిన్ని వైద్య పరీక్షలు కొనసాగుతున్నాయని, పూర్తి నివేదికలు వచ్చిన తర్వాత తదుపరి చికిత్సపై నిర్ణయం తీసుకుంటామని వెల్లడించారు.

అలాగే, బాలకృష్ణ గత వైద్య చరిత్రను కూడా పరిగణనలోకి తీసుకుని అన్ని జాగ్రత్తలు తీసుకుంటున్నామని వైద్యులు తెలిపారు. వివిధ విభాగాల నిపుణులతో కూడిన ప్రత్యేక వైద్య బృందం ఆయన ఆరోగ్యాన్ని నిరంతరం పరిశీలిస్తోందని పేర్కొన్నారు. ప్రస్తుతం ఆయన ఆరోగ్య పరిస్థితి నిలకడగా ఉందని, అభిమానులు ఎలాంటి ఆందోళన చెందాల్సిన అవసరం లేదని స్పష్టం చేశారు.

ఈ వార్త బయటకు వచ్చిన వెంటనే సినీ పరిశ్రమ నుంచి పలువురు ప్రముఖులు, అభిమానులు సోషల్ మీడియా ద్వారా బాలయ్య త్వరగా కోలుకోవాలని ఆకాంక్షించారు. నందమూరి కుటుంబ సభ్యులతో పాటు పలువురు దర్శకులు, నిర్మాతలు కూడా ఆయనకు మద్దతుగా సందేశాలు పోస్ట్ చేశారు.

ఇదిలా ఉంటే, గోపీచంద్ మలినేని దర్శకత్వంలో తెరకెక్కుతున్న ‘NBK 111’ చిత్రంపై ఇప్పటికే భారీ అంచనాలు ఉన్నాయి. యాక్షన్ ఎంటర్‌టైనర్‌గా రూపొందుతున్న ఈ సినిమాను ఈ ఏడాది డిసెంబర్ విడుదల లక్ష్యంగా నిర్మిస్తున్నారు. ప్రస్తుతం బాలయ్య ఆరోగ్యంపై అధికారిక ప్రకటన రావడంతో అభిమానులు కొంత ఊరట చెందారు. ఆయన త్వరగా కోలుకుని మళ్లీ షూటింగ్‌లో పాల్గొనాలని అందరూ కోరుకుంటున్నారు.