నందమూరి బాలకృష్ణ ప్రస్తుతం కె.ఎస్.రవికుమార్ డైరెక్షన్లో తన 105 వ చిత్రాన్ని చేస్తున్నాడు. ఇక ఈరోజు ఆయన 59 వ పుట్టిన రోజు. ఇదిలా ఉండగా ఇప్పటికే చిరంజీవి, నాగార్జున వారసులు ఇండస్ట్రీలో ఎంట్రీ ఇచ్చి రాణిస్తున్నారు. ఇక నందమూరి మూడో తరం వారసుడు.. బాలయ్యను తనయుడు అయిన నందమూరి మోక్షజ్ఞ ఎప్పుడెప్పుడు హీరోగా ఎంట్రీ ఇస్తాడా.. అని నందమూరి అభిమానులు వేయి కళ్ళతో ఎదురు చూస్తున్నారు. అయితే వారి ఆశల పై నీళ్ళు జల్లాడు మోక్షజ్ఞ. తనకు వ్యాపారాల్లో రాణించాలని ఉందని, హీరో కావడంపై ఆసక్తి లేదని పెద్ద బాంబ్ పేల్చాడు.
ఇప్పుడు ఈ వార్త ఫిల్మ్ నగర్ లో హాట్ టాపిక్ గా మారింది. కొంతకాలం క్రితం యాక్టింగ్, డ్యాన్స్ క్లాసులకు మోక్షజ్ఞ వెళ్ళాడని, అది పూర్తయిన వెంటనే హీరోగా ఎంట్రీ ఇస్తాడని ప్రచారం జరిగింది. దీంతో నందమూరి అభిమానులంతా త్వరలోనే కొత్త వారసుడు రానున్నాడని సంబరపడ్డారు. అయితే, తండ్రి బలవంతం మీదే మోక్షజ్ఞ ఈ క్లాస్ లకు హాజరయ్యాడని, తిరిగి వచ్చి, తన రెగ్యులర్ కార్యకలాపాల్లోనే నిమగ్నం అయ్యాడని సమాచారం. తాజాగా ‘మోక్షజ్ఞ కేరాఫ్ కాఫీ షాప్’ అంటూ ఓ ఆంగ్ల దినపత్రికలో ప్రత్యేక కథనం సైతం ప్రచురితమైంది. అభిమానులు మోక్షజ్ఞ ఎంట్రీ కోసం ఎదురుచూస్తుంటే.. మోక్షజ్ఞ ఇలా షాకిచ్చాడు. మరి ఈ వార్తల పై బాలయ్య ఎటువంటి క్లారిటీ ఇస్తాడో చూడాలి..!
