శింబు – నయనతార మధ్య ఏం జరిగిందో అందరికీ తెలుసు. ఇప్పుడు ఎవరి లైఫ్‌ వాళ్లు జీవిస్తున్నారు. కాబట్టి ఆ అంశాల జోలికి వెళ్లడం లేదు. అయితే, అప్పుడెప్పుడో 20 ఏళ్ల సినిమాలో నటించి ఈ ఇద్దరూ ఇప్పుడు మళ్లీ కలసి నటిస్తున్నారు అనే వార్త సోషల్‌ మీడియాలో వైరల్‌ అవుతోంది. ఆ మధ్య సినిమాలకు గ్యాప్‌ ఇచ్చినట్లు కనిపించిన శింబు.. ఇప్పుడు ఫుల్‌ స్వింగ్‌లో కొత్త కథలు విని, ఓకే చేసి పట్టాలెక్కించే పనిలో ఉన్నాడు.
ఈ క్రమంలో కీర్తిశ్వరన్‌ సినిమా వివరాలు బయటకు వచ్చాయి. ‘డ్యూడ్‌’ సినిమాతో ప్రేక్షకుల మన్ననలు, బాక్సాఫీసు వసూళ్లు, ఇండస్ట్రీ మెప్పులు పొందారు కీర్తిశ్వరన్‌. ఇప్పుడు తన రెండో సినిమానో లేదంటే మూడో సినిమానో శింబుతో చేయాలని అనుకుంటున్నారు. ఈ క్రమంలో అన్ని ఏర్పాట్లు జరిగిపోయాయి అని చెబుతున్నారు. ఈ నేపథ్యంలో హీరోయిన్‌ ఎవరు అనే చర్చ జరగ్గా.. ఆ డిస్కషన్‌లో నయనతార పేరు వినిపించింది.
నయనతార – శింబు అంటే కోలీవుడ్‌ బ్లాక్‌బస్టర్‌ పెయిర్‌. ఎప్పుడో 2006లో ‘వల్లవన్‌’ అనే సినిమా చేసిన ఈ ఇద్దరూ ఆ తర్వాత 13 ఏళ్లకు ‘ఇస్పేడ్‌ రాజువుమ్‌ ఇదయ రానియుమ్‌’ అనే సినిమాలో కాసేపు కలసి కనిపించారు. మళ్లీ ఇప్పుడు ఇన్నేళ్లకు జరుగుతోంది అంటున్నారు. త్వరలోనే ఈ విషయంలో క్లారిటీ వస్తుందట.
ఇక శింబు సినిమాలు చూస్తే.. వెట్రిమారన్‌ డైరక్షన్‌లో ‘అరసన్‌’ సినిమా చేస్తున్నాడు. ఆ తర్వాత దేశింగ్‌ పెరియసామి దర్శకత్వంలో ఒకటి, అశ్వత్‌ మరిముత్తుతో ఇంకొకటి ఉండబోతున్నాయి. ఆ తర్వాత కీర్తిశ్వరన్‌ సినిమా ఉంటుంది అని చెబుతున్నారు. శింబుకు వీలు కుదిరేలోపు జేసన్‌ సంజయ్‌ డెబ్యూ సినిమా చేయాలని కీర్తిశ్వరన్‌ అనుకుంటున్నారట.
ఈ సినిమాకు సాయి అభ్యంకర్‌ సంగీతం అందిస్తారట. శింబు, నయన్‌ ఈ సినిమాకు అయితే వారికి సాయి ఎలాంటి పాటలు ఇస్తారో చూడాలి. ఆయన ఇలాంటి పాటలకు ప్రసిద్ధి కదా.
