Jailer 2: ‘జైలర్‌ 2’.. ఇద్దరు స్టార్‌ హీరోలను చూస్తున్న నెల్సన్‌.. ఎవరంటే?

‘జైలర్‌’ (Jailer) సినిమా విజయం వెనుక ఘన సూపర్‌స్టార్‌ రజనీకాంత్‌ (Rajinikanth)  , దర్శకుడు నెల్సన్‌ దిలీప్‌ కుమార్‌ (Nelson Dilip Kumar) మాత్రమే కాదు.. గెస్ట్‌ పాత్రలు కూడా ఉన్నాయి. సినిమాలో కీలక సమయాల్లో ఆ గెస్ట్‌ పాత్రలు వచ్చి సినిమాను మరో స్థాయికి తీసుకెళ్లాయి. ప్రస్తుతం ఆ సినిమాకు సీక్వెల్‌ ఉంది అంటూ వార్తలు వస్తున్న నేపథ్యంలో కొత్తగా రెండు వార్తలు చక్కర్లు కొడుతున్నాయి. అన్నీ అనుకున్నట్లుగా జరిగితే సినిమాలో ఇద్దరు స్టార్‌ హీరోలు కొత్తగా వస్తారట.

Jailer 2

రజనీకాంత్ కెరీర్‌ అయిపోయింది అని విమర్శలు వస్తున్న సమయంలో నెల్సన్‌ దిలీప్‌ కుమార్‌తో కలిసే సరికి ఇదేంటి ఫ్లాప్‌ డైరక్టర్‌తో సినిమా చేస్తున్నారు తలైవా అని విమర్శలు వచ్చాయి. కానీ ఆ కాంబినేషన్‌ బాక్సాఫీసు దగ్గర ఏకంగా రూ.600 కోట్లకుపైగా వసూళ్లు అందుకుంది. దీంతో ఈ సినిమాను తక్కువగా అంచనా వేసినవారు అంతా కంగుతిన్నారు. ఆ సినిమాకు మించి ఉండేలా ‘జైలర్‌ 2’ (Jailer 2) ను ప్లాన్‌ చేస్తున్నారని టాక్‌ వినిపిస్తోంది.

ఈ క్రమంలో రెండో ‘జైలర్‌’.. తొలి ‘జైలర్’కు ప్రీక్వెల్‌గా ఉంటుందని చెబుతున్నారు. మరికొందరైతే వర్మ క్యారెక్టర్ అయిపోయింది కానీ ఇంకో పెద్ద విలన్‌ ఉంటాడని, వాడితో జైలర్‌ పోరాటం రెండో పార్టులో చూపిస్తారు అని అంటున్నారు. దీంతో మరోసారి గెస్ట్‌ పాత్రల అవసరం ఉంటుంది అని అంచనా వేస్తున్నారు. ఆ పాత్రల కోసం తలైవా మాజీ అల్లుడు ధనుష్‌ (Dhanush) , నందమూరి బాలకృష్ణ (Nandamuri Balakrishna) పేర్లు వినిపిస్తున్నాయి. దీనిపై చర్చలు చివరి దశకు వచ్చాయని కూడా టాక్.

నిజానికి ‘జైలర్‌’ సినిమాలోనే బాలయ్య కోసం ఓ పాత్ర అనుకున్నారట. దేవాలయాలకు సంబంధించిన ఆ పాత్ర విషయంలో బాలయ్య అప్పట్లో అంత ఆసక్తిగా లేరు అని అంటున్నారు. కానీ ఇప్పుడు రెండో పార్టులో పవర్‌ఫుల్‌ క్యారెక్టర్ ఒకటి రాసుకున్నారని.. ఈసారి బాలయ్యను ఒప్పిస్తారని చెబుతున్నారు. చూద్దాం మరి బాలయ్య – రజనీకాంత్‌ కాంబో స్క్రీన్‌ మీద కనిపిస్తే ఎలా ఉంటుందో?