జై లవ కుశ తర్వాత యంగ్ టైగర్ ఎన్టీఆర్ మాటల మాంత్రికుడు త్రివిక్రమ్ శ్రీనివాస్ దర్శకత్వంలో నటిస్తున్న సంగతి తెలిసిందే. ఈ సినిమా మొదటి షెడ్యూల్ హైదరాబాద్ శివారులలో విజయవంతంగా పూర్తి అయింది. యాక్షన్ సీన్ చిత్రీకరించారు. ఆ సన్నివేశంలో ఎన్టీఆర్ ఎలా ఉంటారో ఫస్ట్ లుక్ ద్వారా రుచి చూపించారు. ఇక తాజా షెడ్యూల్ నేడు రామోజీ ఫిలిం సిటీలో మొదలయింది. నాలుగు కోట్లతో నిర్మించిన రాయలసీమలోని ఒక గ్రామానికి చెందిన సెట్ లో నెలరోజుల పాటు షూటింగ్ జరగనుంది. ఈ షెడ్యూల్లో దాదాపు చిత్రంలోని నటీనటులందరూ పాల్గొననున్నారు.
ఈ షెడ్యూల్ తో దాదాపు 50 శాతం సినిమా కంప్లీట్ అవుతుందని సమాచారం. జిగేల్ రాణి పూజ హెగ్డే హీరోయిన్ గా నటిస్తున్న ఈ సినిమాకి అరవింద సామెత వీర రాఘవ అని విభిన్నమైన టైటిల్ పెట్టి డైరక్టర్ సినిమాపై ఆసక్తిని మరింత పెంచారు. జగపతిబాబు ఎన్టీఆర్ కి రెండోసారి విలన్ గా నటిస్తున్న ఈ మూవీకోసం ఎస్.ఎస్. థమన్ అదిరే పాటలను అందించే పనిలో ఉన్నారు. తొలిసారి ఎన్టీఆర్, త్రివిక్రమ్ కలయికలో రూపుదిద్దుకుంటున్న ఈ చిత్రంపై భారీ అంచనాలున్నాయి. హారిక అండ్ హాసిని క్రియేషన్స్ బ్యానర్లో రాధాకృష్ణ నిర్మిస్తున్న ఈ చిత్రం అక్టోబర్ లో థియేటర్లోకి రానుంది.
Home