ఎన్టీఆర్ సినిమా సీక్వెల్ లో బన్నీ!

సాధారణంగా సినిమాకి సీక్వెల్ అంటే.. నిర్మాత మారినా దర్శకుడు, హీరో మారరు. అలాంటిది ఎన్టీఆర్ సినిమా సీక్వెల్ లో అల్లు అర్జున్ నటించడం చిత్రమే. ఆ కథ తెలియాలంటే.. ఫ్లాష్ బ్యాక్ లోకి వెళ్లాలి. వివి వినాయక్ దర్శకత్వంలో ఎన్టీఆర్ హీరోగా వచ్చిన ‘అదుర్స్’ సినిమా గుర్తుందిగా. అందులో ఎన్టీఆర్ పోషించిన ‘చారి’ పాత్రకి ఎంతటి స్పందన వచ్చిందో తెలిసిందే. దానికి కొనసాగింపుగా అదుర్స్ 2 చేయాలని అప్పట్నుంచి ప్రయత్నాలు జరుగుతూనే ఉన్నాయి.ఇప్పుడు బన్నీ హీరోగా ఆ సినిమా పట్టాలెక్కనుందని ఇండస్ట్రీ వర్గాలు చెవులు కొరుక్కుంటున్నాయి.

వాస్తవానికి ‘చారి’ పాత్ర సృష్టికర్త హరీష్ శంకరేనట. దర్శకుడిగా తొలి సినిమా తర్వాత మళ్ళీ రైటర్ గా మారిన హరీష్ మిరపకాయ్ సినిమాకి ముందు ఈ పాత్రని చిత్రించాడట. ‘మిరపకాయ్’ సినిమాలోని హీరోయిన్ పాత్ర కూడా బ్రాహ్మణ కుటుంబానికి చెందినదే. పక్కింట్లో ఉన్న ఓ బ్రాహ్మణ కుటుంబం ప్రేరణతో ఈ పాత్రలను సృష్టించాడట హరీష్ శంకర్. ఈ కథ కాసేపు పక్కనపెడితే ఇన్నేళ్లయినా అదుర్స్ సీక్వెల్ కి సంబంధించి ఎలాంటి కదలిక లేకపోడంతో దానికే కొన్ని మెరుగులు దిద్ది ‘దువ్వాడ జగన్నాధం’గా ముస్తాబు చేశాడట. ఇదెంతవరకూ నిజమన్నది ప్రస్తుతానికి హరీష్ కే ఎరుక. దీంతోపాటు ఇతగాడు హిందీ చిత్రం ‘స్పెషల్ 26’ సినిమాని తెలుగులో రీమేక్ చేయడానికి రెడీ అవుతున్నాడట