అరవింద సమేత వీర రాఘవతో పోటీ పడనున్న సినిమాలు!

యంగ్ టైగర్ ఎన్టీఆర్‌, త్రివిక్రమ్‌ కలయికలో రూపుదిద్దుకుంటున్న “అరవింద సమేత వీర రాఘవ” దసరాకి  రిలీజ్ చేస్తున్నట్టు ముందుగానే ప్రకటించారు. అక్టోబర్ 11 న విడుదల చేయడానికి సన్నాహాలు చేస్తున్నారు. అయితే అందరూ ఎన్టీఆర్ సోలో గా వచ్చి కలక్షన్స్ అందుకోనున్నట్లు భావించారు. కానీ ఎన్టీఆర్ కి పోటీ తప్పేలా లేదు. మాస్ మహారాజ్ రవితేజ, శ్రీనువైట్ల కాంబినేషన్లో  “అమర్‌ అక్బర్‌ ఆంటోనీ” తెరకెక్కుతోంది. ప్రస్తుతం అమెరికాలో చిత్రీకరణ జరుపుకుంటోంది. ఇది కూడా దసరాకే థియేటర్లో సందడి చేయనుంది. రామ్‌ కథానాయకుడిగా తెరకెక్కుతున్న ‘హలో గురూ ప్రేమ కోసమే జీవితం’ కూడా దసరాకే వస్తోంది.

త్రినాథ్‌ నక్కిన దర్శకత్వంలో తెరకెక్కుతోన్న ఈ సినిమాని దిల్‌రాజు నిర్మిస్తున్నారు. పండుగకి రిలీజ్ చేయడానికి పక్కా ప్లాన్ చేస్తున్నారు. నాగార్జున, నానిల కాంబినేషన్‌లో ఓ మల్టీస్టారర్‌ రూపుదిద్దుకుంటున్న సంగతి తెలిసిందే. శ్రీరామ్‌ ఆదిత్య దర్శకత్వం వహిస్తున్న ఈ మూవీ దసరాకి రానుంది. అలాగే యువ హీరో శర్వానంద్‌, సాయి పల్లవి జంట గా చేస్తున్న “పడి పడి లేచె మనసు” దసరాకి ప్రేక్షకుల ముందుకు రాబోతోంది.  ఇవే కాకుండా విశాల్ పందెం కోడి 2 , హరి దర్శకత్వంతో రూపొందుతున్న సామీ 2  కూడా అప్పుడే థియేటర్లోకి రానున్నాయి. ఒకే రోజు కాకపోయినప్పటికీ ఎన్టీఆర్ చిత్రానికి ఒక రోజు, ఒక వారం గ్యాప్ లో రిలీజ్ కానున్నాయి. ఈ పోటీలో ఎవరిది పై చేయి అవుతుందో.. ప్రేక్షకుల చేతుల్లోనే ఉంది.