ఎన్టీఆర్ సినిమాకి తప్పని లీకుల బెడద!

యంగ్ టైగర్ ఎన్టీఆర్ సినిమా అనగానే అభిమానుల్లో క్రేజ్ ఉంటుంది. ఇంకా మాటల మాంత్రికుడు త్రివిక్రమ్ శ్రీనివాస్ దర్శకత్వంలో నటిస్తుండడం “అరవింద సమేత వీర రాఘవ” సినిమాకి మరింత క్రేజ్ ని తీసుకొచ్చింది. అందుకే ఈ సినిమా గురించి తెలుసుకోవాలనే ఆరాటం పెరిగింది. ఈ ఆరాటమే అనర్ధాలకు కారణమవుతోంది. ఈ చిత్రంలోని ఓ కీలక సీన్ ఒకటి ఫోటో రూపంలో బయటికి లీక్ అయింది. ప్రాణాలతో కొట్టుమిట్టాడుతున్న నాగబాబును రక్షించే ప్రయత్నంలో ఉన్న తారక్ చిత్రం ఒకటి సోషల్ మీడియాలో తెగ చక్కర్లు కొడుతోంది. ఇందులో మెగా బ్రదర్.. ఎన్టీఆర్ కి తండ్రిగా నటిస్తున్నారు. ఇలా నటించడం కూడా ఇదే తొలిసారి. పైగా రాయలసీమ నేపథ్యంలో సాగే మూవీ. ఫ్యాక్షన్ లీడర్ల మధ్య సమరం ఉంటుంది.

నాగబాబు ఒక ఫ్యాక్షన్ లీడర్ అయితే.. అవతల పక్క జగపతి బాబు లీడర్ గా కనిపించనున్నారు. వీరి గొడవల తర్వాత సన్నివేశానికి సంబంధించిన ఫోటోగా దీనిని అంచనా వేస్తున్నారు. ఏదేమైనా ఈ ఫోటో చిత్రంపై మరింత అంచనాలను పెంచింది. పూజా హెగ్డే,  ఈషా రెబ్బా హీరోయిన్లుగా నటిస్తున్న ఈ చిత్రం షూటింగ్ జోరుగా సాగుతోంది. థమన్ సంగీతం అందిస్తున్న ఈ చిత్రాన్ని హారిక హాసిని క్రియేషన్స్ బ్యానర్ ఫై రాధాకృష్ణ నిర్మిస్తున్నారు.  “అరవింద సమేత” టీజర్‌ ను ఇండిపెండెన్స్ డే సందర్భంగా ఆగష్టు 15న, చిత్రాన్ని దసరా కానుకగా అక్టోబర్‌ 10న విడుదల చేయనున్నారు.