మహేష్ బాబు సినిమాలో విలన్ గా గోపీచంద్!

హీరోగా కెరీర్ మొదలెట్టినప్పటికీ తర్వాత “నువ్వు నేను, నిజం, వర్షం” చిత్రాల్లో విలన్ గా నటించడం వల్లే ఎక్కువ పేరు సంపాదించడంతోపాటు నటుడిగా తనదైన మార్క్ క్రియేట్ చేయగలిగాడు గోపీచంద్. నిన్నమొన్నటివరకూ యావరేజ్, ఎబౌ యావరేజ్ లతో కెరీర్ ను నెట్టుకొచ్చిన గోపీచంద్ ఇటీవలకాలంలో వరుస పరాజయాలతో బాగా ఢీలాపడ్డాడు. ఇక గోపీచంద్ నటించిన “ఆరడుగుల బుల్లెట్, ఆక్సిజన్” చిత్రాలు ఎప్పుడు రిలీజావుతాయో కూడా తెలియని పొజిషన్. ఈ తరుణంలో గోపీచంద్ తన కెరీర్ కి సంబంధించిన కీలకమైన నిర్ణయం తీసుకొన్నాడని తెలుస్తోంది.

మహేష్ బాబు హీరోగా బోయపాటి దర్శకత్వంలో 14 రీల్స్ సంస్థ ఓ మాస్ మసాలా ఎంటర్ టైనర్ ను రూపొందించనున్న విషయం తెలిసిందే. ఈ చిత్రంలో విలన్ గా గోపీచంద్ ను సంప్రదించారట. మహేష్ బాబు సినిమా కావడమే కాక.. బోయపాటి దర్శకుడు కావడం, బోయపాటి తన మునుపటి చిత్రాల్లో జగపతిబాబు, ఆది పినిశెట్టిలను విలన్లుగా సూపర్ పవర్ ఫుల్ గా చూపించిన విధానం నచ్చడంతో వెంటనే ఒప్పేసుకొన్నాడట గోపీచంద్. ప్రస్తుతం ఈ వార్త ఫిలిమ్ నగర్ వర్గాల్లో హల్ చల్ సృష్టిస్తోంది. గోపీచంద్ నిజంగా ఆ విలన్ ఆఫర్ ను ఒప్పుకొన్నాడో లేదో తెలియదు కానీ.. ఒకవేళ ఒప్పుకొంటే మాత్రం మనోడి కెరీర్ కి కీలకమైన టర్నింగ్ పాయింట్ గా ఈ సినిమా నిలిచే అవకాశం పుష్కలంగా ఉంది.