2020 కరోనా లాక్ డౌన్ టైంలో TVF సంస్థ అమెజాన్ ప్రైమ్ లో విడుదల చేసిన “పంచాయత్” (Panchayat) నచ్చని వారు ఉండరు అని చెప్పడంలో ఎలాంటి అతిశయోక్తి ఉండదు. అప్పటివరకు సిరీస్ అంటే శృంగారం, హింస, బూతులు అని అలవాటుపడుతున్న తరుణంలో.. అసభ్యతకు తావులేకుండా తెరకెక్కిన “పంచాయత్” అందర్నీ అమితంగా ఆకట్టుకుంది. సెకండ్ సీజన్ కోసం జనాలు గట్టిగానే వెయిట్ చేశారు. 3వ సీజన్ కి వచ్చేసరికి కాస్త సాగదీసిన భావన కలిగింది. మరి సరైన ముగింపు ఇవ్వని 4వ సీజన్ అకస్మాత్తుగా ప్రత్యక్షమైంది. మరి ఈ 4వ సీజన్ ఎలా ఉంది? సిరీస్ ఫ్యాన్స్ ను సాటిస్ఫై చేసిందా? అనేది చూద్దాం..!!
కథ: పథాన్ జీ (రఘుబీర్ యాదవ్) మీద జరిగిన హత్యా ప్రయత్నంతో ముగిసిన సీజన్ 3 నుంచి సీజన్ 4 కంటిన్యూ అయ్యింది. ఎమ్మెల్యే కారణంగా ప్రధాన మరియు సెక్రటరీ అభిషేక్ త్రిపాఠి (జితేందర్) ఎలాంటి ఇబ్బందులు పడ్డారు? అనేది చూపిస్తూనే.. ఫులేరా గ్రామంలో ప్రెసిడెంట్ ఎలక్షన్స్ హంగామా మొదలవుతుంది.
ఈ రచ్చలో ఎవరు గెలిచారు? ఇంతకీ ప్రధాన్ జీ మీద హత్యా ప్రయత్నం చేసింది ఎవరు? వంటి ప్రశ్నలకు సమాధానమే “పంచాయత్ సీజన్ 4”.
నటీనటుల పనితీరు: నటీనటులుగా ఎవరెలా నటించారు అనేది ప్రత్యేకంగా చెప్పాల్సిన అవసరం లేదు. ఎందుకంటే.. ఈ సిరీస్ ప్రసారమైనప్పటినుంచి ప్రతి ఒక్క నటుడు పాత్ర పేరుతోనే గుర్తుండిపోయాడు. చాలామంది సీనియర్ నటులకైతే సినిమాలంటే ఈ సిరీస్ తోనే ఎక్కువ పేరు వచ్చింది.
అయితే.. మొదటి రెండు సీజన్లు ఆసక్తికరంగా సాగిన పాత్రలు.. 3వ సీజన్ నుంచి మాత్రం బోర్ కొట్టదా మొదలుపెట్టాయి. ముఖ్యంగా అపోజిషన్ టీమ్ మెంబర్స్ క్యారెక్టర్ కి ఒక రీజనింగ్ లేకపోవడంతో వాళ్ల చేష్టలు వెగటు పుట్టించాయి.
సాంకేతికవర్గం పనితీరు: రచయితలు, దర్శకులకు ఈ సిరీస్ క్రేజ్ ను వాడుకుందామనే తపనే ఎక్కువగా ఉంది తప్పితే.. మంచి ముగింపు ఇద్దామనే ఆలోచన మాత్రం 8 ఎపిసోడ్లలో ఎక్కడా కనిపించలేదు. పాత్రలను, సందర్భాలను సాగదీసిన విధానం ప్రేక్షకుల సహనాన్ని పరీక్షించడమే కాక, సిరీస్ మీద ఉన్న అభిమానాన్ని కూడా పోగొడుతుంది. మరి వైరల్ ఫీవర్ లాంటి సంస్థ ఈ విధమైన డెసిషన్ తీసుకుంది అనే ఆలోచనే ఇబ్బందిపెడుతుంది. కంటెంట్ క్వాలిటీకి ఎక్కువ ప్రాధాన్యత ఇచ్చే అతి తక్కువ సంస్థల్లో TVF ఒకటి, వాళ్లు తమ తదుపరి సిరీస్ ల విషయంలో ఇలా వ్యవహరించరు అని నమ్మడం తప్ప ఏమీ చేయలేం.
ఇకపోతే.. టెక్నికల్ గా సిరీస్ మీద ఎలాంటి కంప్లైంట్స్ లేవు. కెమెరా, మ్యూజిక్, ఎడిటింగ్ వంటివన్నీ డీసెంట్ గా ఉన్నాయి. అయితే.. వీటన్నిటినీ ఆసక్తికరంగా నడిపించాల్సిన కథ-కథనంలో పట్టు లోపించడంతో, ఇవేమీ ఎలివేట్ అవ్వలేదు.
విశ్లేషణ: ఒక సినిమా లేదా సిరీస్ ఆడియన్స్ ను ఆకట్టుకుంటుంది అంటే.. దాని కొనసాగింపు మరింత ఆసక్తికరంగా ఉండాలే కానీ, ఏదో సదరు సిరీస్ యొక్క క్రేజ్ ను వాడుకోవడం కోసం సాగదీయకూడదు. కానీ “పంచాయత్” విషయంలో జరిగింది అదే. ఎలాంటి అసభ్యత లేకపోయినా మరీ సీరియల్ లా సాగిన ఈ 4వ సీజన్ సాధారణ ప్రేక్షకులనే కాదు, సదరు సిరీస్ హార్డ్ కోర్ ఫ్యాన్స్ ను కూడా ఆకట్టుకోలేదు. కాకపోతే.. సెన్సిబిలిటీస్ & స్వీట్ కామెడీ కోసం సరదాగా చూడొచ్చు.
ఫోకస్ పాయింట్: ఈ పంచాయితీని ఇంకా సాగదీయకపోవడం బెటర్!
రేటింగ్: 2/5
