పవర్ స్టార్ పవన్ కళ్యాణ్ త్వరలోనే బుల్లెతెర బాటలో నడవనున్నట్లు తెలుస్తుంది. హిందీలో అమీర్ ఖాన్ హోస్ట్ గా పాపులర్ అయిన “సత్యమేవ జయతే” షో ప్రేరణతో పవర్ స్టార్ పవన్ కళ్యాణ్ ఓ బుల్లితెర షో చేసేందుకు రెడీ అవుతున్నారని పవన్ అభిమానుల ద్వారా తెలుస్తుంది. ప్రజల్లో చైతన్యం తీసుకువచ్చేందుకు ప్రజా సమస్యలను బాహ్య ప్రపంచానికి చాటి చెప్పేందుకు ఈ ప్రోగ్రాం ఉంటుందని పవన్ అభిమానులు సోషల్ మీడియా ద్వారా ధృవీకరించారు. ప్రస్తుతం పవన్ కళ్యాణ్ ఏపీ మొత్తం యాత్ర చేసే ఆలోచనలో ఉన్నారు.
యాత్రల ద్వారా మొత్తం ప్రజలను కలుసుకునే వీలు లేకపోవడంతో ఈ షోను ఉపయోగించుకొని ముందుకు వెళ్లాలనే ఆలోచనలో పవన్ ఉన్నట్టు తెలిసింది. ప్రజల్లో చైతన్యం రేకెత్తిస్తూనే తన రాజకీయ జీవితానికి అనుకూలంగా ఈ షోను మలిచేందుకు పవన్ నిర్ణయం తీసుకున్నట్టు సమాచారం. పవన్ కళ్యాణ్ కు ఈటీవీ సంస్థల ఎండీ రామోజీరావుతో ఉన్న అనుబంధం కారణంగా.. ఈ షోను ఈటీవీ వారు నిర్మించే అవకాశం ఉందని తెలుస్తోంది. దీంతో తమ అభిమాన నటుడుని వెండితెరపై చూసుకోలేకపోతున్నామని ఆవేదన చెందుతున్న అభిమానులు బుల్లితెరపై చూసుకొని మురిసిపోదామని అనుకుంటున్నారు.
