కేవలం ప్రేమ కథలనే నమ్ముకుంటే పోటీని తట్టుకోవడం కష్టమని భావించిన నిఖిల్.. హారర్, థ్రిల్లర్ కథలతో సినిమాలు చేస్తూ తనకంటూ ఓ గుర్తింపును సాధించుకున్నారు. ఇప్పుడు తొలిసారిగా రీమేక్ చేస్తున్నారు. కన్నడ బ్లాక్ బస్టర్ రీమేక్ కిరాక్ పార్టీ ని పూర్తి చేసే పనిలో ఉన్నారు. దీని తర్వాత కూడా మరో రీమేక్ చేయనున్నారు. కనితన్ పేరుతో రెండేళ్ళ క్రితం వచ్చిన కోలీవుడ్ సూపర్ హిట్ మూవీని నిఖిల్ తెలుగు వారికీ తన స్టైల్లో చూపించనున్నారు. ఈ రెండు చిత్రాల తర్వాత కథని కూడా నిఖిల్ ఓకే చెప్పినట్లు తెలిసింది. పెళ్లి చూపులు సినిమాతో పరిశ్రమని ఆకర్షించిన తరుణ్ భాస్కర్ చెప్పిన కథ నచ్చడంతో.. అతని దర్శకత్వంలో నటించడానికి గ్రీన్ సిగ్నల్ ఇచ్చారు.
ప్రస్తుతం తరుణ్ భాస్కర్ తన రెండో సినిమాని తెరకెక్కిస్తున్నారు. “నగరానికి ఏమైంది” అనే టైటిల్ పరిశీలిస్తున్న ఇందులో కూడా కొత్త నటీనటులు నటిస్తున్నారు. ఐదారు నెలల క్రితం ఈ మూవీ షూటింగ్ మొదలైంది. 40 శాతం చిత్రీకరణ పూర్తి అయినట్లు తెలిసింది. ఈ సినిమాని కంప్లీట్ చేసిన తర్వాత నిఖిల్ కథపై దృష్టి పెట్టనున్నారు. స్క్రిప్ట్ వర్క్ పూర్తి చేసి వచ్చే ఏడాది సెట్స్ మీదకు తీసుకెళ్లనున్నారు. వీరిద్దరి కాంబినేషన్లో మూవీ యువతలో తప్పకుండా ఆసక్తిని కలిగిస్తుందని ఫిలిం నగర్ వాసులు చెబుతున్నారు.
