‘పెళ్ళి చూపులు’ చిత్రంతో కమెడియన్‌గా మంచి క్రేజ్ సంపాదించుకున్నాడు ప్రియదర్శి. రెగ్యులర్ గా సాగే పంచ్ డైలాగులు, బకరా ఫార్మేట్ లో సాగే కామెడీతో విసిగిపోయిన ప్రేక్షకులకి.. ప్రియదర్శి కామెడీ ఓ రిలీఫ్ అనే చెప్పాలి. కమెడియన్ గానే కాకుండా నటుడిగా కూడా ఫుల్ బిజీ గా ఉన్నాడు ప్రియదర్శి. ప్రస్తుతం చిన్న సినిమాల దగ్గర్నుండీ పెద్ద సినిమాల వరకూ.. ప్రియదర్శి నటిస్తున్నాడంటే ఆ చిత్రం పై స్పెషల్ క్రేజ్ నెలకొంటుంది అనడంలో అతిశయోక్తి లేదు. అయితే ప్రియదర్శి ఇప్పుడు ప్రేక్షకులకి షాక్ ఇవ్వబోతున్నాడంట.
ప్రస్తుతం `మిఠాయి`, పద్మశ్రీ పురస్కార గ్రహీత చింతకింది మల్లేశం జీవిత కథతో తెరకెక్కుతున్న`మల్లేశం` చిత్రంలో హీరోగా నటిస్తున్నాడు దర్శి. ఇదిలా ఉండగా త్వరలోనే దర్శకుడిగా కూడా మారబోతున్నాడట. ‘పెళ్ళి చూపులు’ చిత్ర డైరెక్టర్ తరుణ్ భాస్కర్ ఈ విషయాన్ని వెల్లడించాడు. ఇటీవల `మిఠాయి` ఆడియో లాంచ్ కి అతిథిగా విచ్చేసిన తరుణ్ భాస్కర్ “నేను యాక్టర్ అయ్యానని ఏడిపిస్తున్నారు. దర్శి త్వరలో డైరెక్టర్ కాబోతున్నాడు… కరక్టే కదా.. ఎస్ దర్శి దర్శకత్వ బాధ్యతలు చేపట్టబోతున్నారు“ అంటూ బహిరంగంగా చెప్పేసాడు తరుణ్ భాస్కర్. స్వతహాగా తరుణ్ భాస్కర్ , ప్రియదర్శి స్నేహితులు కాబట్టి.. ఇది నిజమే అవ్వొచ్చు అనే అనుమానం వ్యక్తం చేస్తున్నారు ఫిలింనగర్ విశ్లేషకులు. ఇలా కామెడీ పాత్రలు చేస్తూ డైరెక్టర్లుగా మారిన వాళ్ళు గతంలో చాలామంది ఉన్నారు. ఇప్పుడు ఆ లిస్ట్ లో ప్రియదర్శి కూడా జాయిన్ అవ్వబోతున్నాడన మాట..!
