మొన్నటివరకూ గోల్డెన్ లెగ్ అని అందరూ ముద్దుగా పిలుచుకొన్న రకుల్ ప్రీత్ సింగ్ ఉన్నట్లుండి ఐరెన్ లెగ్ అయిపోయింది. వరుసబెట్టి పరాజయాలు ఆమెను వరించడమే అందుకు కారణం. “విన్నర్, రారండోయ్ వేడుక చూద్దాం, జయ జానకి నాయక, స్పైడర్” సినిమాలు సూపర్ ఫ్లాప్స్ గా నిలవడమే కాక సదరు సినిమాల్లో రకుల్ పెర్ఫార్మెన్స్ & లుక్ కు నెగిటివ్ రెస్పాన్స్ ఎక్కువగా లభించడంతో అమ్మడికి అవకాశాలు తగ్గుతూ వచ్చాయి. అప్పటివరకూ నేనంటే నేను అంటూ వెంటపడిన స్టార్ హీరోలందరూ ఒక్కసారిగా సైడైపోయారు. దాంతో రకుల్ తమిళ, హిందీ సినిమాలు అంగీకరించడం మొదలెట్టింది.
రీసెంట్ గా రిలీజైన రకుల్ తమిళ చిత్రం “ఖాకీ” మంచి హిట్ అయినప్పటీకీ.. ఆ సక్సెస్ క్రెడిట్ మొత్తం హీరో కార్తీ కోటాకీ వెళ్లిపోయింది. తెలుగులో సరైన అవకాశాలు లేకపోవడమే కాకుండా పెద్దగా హీరోలు-నిర్మాతలు కూడా అప్రోచ్ అవ్వకపోతుండడంతో తమిళంలోనే రెండు సినిమాలు సైన్ చేసింది రకుల్. అయితే.. రీసెంట్ గా “స్పైడర్” తర్వాత మహేష్ బాబు తన 25వ సినిమాలో కథానాయికగా రకుల్ ను ఎన్నుకొన్నాడనే కథనాలు వెలువడ్డాయి, దర్శకుడు వంశీ పైడిపల్లి కూడా రకుల్ అంటే ఇంట్రెస్ట్ చూపడంతో కాంబినేషన్ రిపీటవ్వడం కన్ఫర్మ్ అనుకొన్నారందరూ.
కట్ చేస్తే.. నిర్మాత దిల్ రాజు మాత్రం రకుల్ అంటే పెద్దగా ఇంట్రెస్ట్ చూపలేదట. ఆమె ట్రాక్ రికార్డ్ పెద్దగా బాగోకపోవడమే కాక అసలే “బ్రహ్మోత్సవం, స్పైడర్” చిత్రాల ఫ్లాప్స్ తో ఢీలాపడ్డ మహేష్ బాబు సరసన రకుల్ నటించడం సరికాదని భావించి.. తమ బ్యానర్ లో వచ్చిన “డీజే”లో తన అందాలతో కనువిందు చేసిన పూజా హెగ్డేనే మళ్ళీ మహేష్ కోసం కన్ఫర్మ్ చేశాడట. ఇలాగే కొనసాగితే రకుల్ కెరీర్ కష్టాల్లో పడ్డట్లే.
