తెలుగు భారీ సీరియల్లో భాగమైన పూనమ్ కౌర్.!

ఇంగ్లిష్ సీరియల్స్ మాదిరిగా… తెలుగులోనూ భారీ సీరియల్స్ రూపుదిద్దుకుంటున్నాయి. బాహుబలి వంటి సినిమాని నిర్మించిన ఆర్కా మీడియా సంస్థ ఈ సాహసానికి సిద్ధమైంది. అత్యంత భారీ బడ్జెట్ తో స్వర్ణ ఖడ్గం అనే సీరియల్ ను రూపొందిస్తోంది. బాహుబలి నిర్మాతల్లో ఒకరైన దేవినేని ప్రసాద్ ఈ భారీ జానపద సీరియల్ ను నిర్మిస్తున్నారు. వి. సత్యనారాయణ దర్శకత్వంలో రూపొందుతున్న ఈ సీరియల్ లో బుజ్జిగాడు ఫేం సంజన గల్రాని కీలక పాత్రలో నటిస్తోంది. ఆమె ఈ సీరియల్ కోసం గుర్రపు స్వారీ, కత్తియుద్థాలలో ప్రత్యేక శిక్షణ తీసుకుంది.

ఆమెపై ఇప్పటికే అనేక సన్నివేశాలు తెరకెక్కించారు. ‘బాహుబలి’ రచయిత విజయేంద్ర ప్రసాద్ స్టోరీని అందిస్తున్న ఈ సీరియల్లో మరో హీరోయిన్ భాగమైంది. మాయ జాలం, ఒక విచిత్రం, వినాయకుడు, గగనం వంటి చిత్రాల్లో నటించిన పూనమ్ కౌర్ ఇందులో ఓ ప్రధాన పాత్ర పోషిస్తున్నట్టు తెలిసింది. ఓ ప్రాంతానికి రాణిగా కనిపించనుంది. త్వరలో ఈ ప్రాజెక్టుకి సంబంధించిన షూటింగ్ మొదలు కాబోతోంది. వెండితెరపైన సంచలన సృష్టించిన ఆర్కా మీడియా సంస్థ.. స్వర్ణఖడ్గంతో బుల్లితెరపైనా సంచనం సృష్టించబోతోందని టీవీ వర్గాల వారు అంచనా వేస్తున్నారు.