మహేష్ బాబు అసెంబ్లీలో పంచ్ లు పేల్చిన పోసాని!

లౌడ్ కామెడీతో ఆకట్టుకుంటున్న నటుడు పోసాని కృష్ణ మురళి.. మరో మారు తనదైన మార్క్ పంచ్ లతో అదరగొట్టనున్నారు. ఏకంగా అసెంబ్లీలో కూర్చొని డైలాగుతో నవ్వులు పూయించనున్నారు. మెసేజ్ ఓరియెంటెడ్ చిత్రాలతో హ్యాట్రిక్ హిట్ అందుకున్న కొరటాల శివ మహేష్ బాబుతో భరత్ అనే నేను మూవీ చేస్తున్నారు. పోటికల్ బ్యాక్డ్రాప్ తో తెరకెక్కుతోన్న ఈ సినిమాలో మహేష్ ముఖ్యమంత్రిగా నటిస్తుండగా పోసాని ఎమ్మెల్యే గా కనిపించనున్నారు.  ఈ మూవీ షూటింగ్ వేగంగా సాగుతోంది. సారధి స్టూడియోలో వేసిన అసెంబ్లీ సెట్ లో కీలక సీన్లు షూట్ చేస్తున్నారు. ఈ చిత్రీకరణకు సంబంధించిన ఒక ఫోటో బయటికి వచ్చింది.

అందులో పోసానితో పాటు సీనియర్ ఆర్టిస్టులు జీవా, బెనర్జీ కూడా ఉన్నారు. ఈ ఫోటో సోషల్ మీడియాలో వైరల్ అయింది. బాలీవుడ్ బ్యూటీ  కైరా అద్వానీ (ధోనీ ఫేమ్) హీరోయిన్ గా నటిస్తున్న ఈ సినిమాకి రాక్ స్టార్ దేవిశ్రీ ప్రసాద్  సంగీతాన్ని అందిస్తున్నారు. డివివి దానయ్య నిర్మిస్తున్న ఈ చిత్రం సంక్రాంతికి రిలీజ్ కానుంది. శ్రీమంతుడు కాంబినేషన్లో వస్తున్న రెండో మూవీ కావడంతో  భరత్ అనే నేనుపై భారీ అంచనాలు ఉన్నాయి.