ఆయనతోపాటు కలసి పని చేసిన కొంతమంది నటులు ఇంకా సినిమాల్లో ఉన్నారు. ఆయన వయసు హీరోలు ఇతర సినిమా పరిశ్రమల్లో ఇంకా పని చేస్తున్నారు. కొంతమంది అయితే ఇండస్ట్రీ హిట్‌లు కొడుతున్నారు. కానీ ఆ హీరో సినిమాలు దూరంగా, అసలు గ్లామర్‌ ఇండస్ట్రీకే దూరంగా ఉంటున్నాడు. నటనలో, డ్యాన్స్‌లో, కామెడీ టైమింగ్‌లో వైవిధ్యం ఉన్న ఆ హీరో అలా అయిపోవడానికి ఆయనకు ఓ అతి నమ్మకమే అని చెబుతున్నారు ప్రముఖ సినీ నిర్మాత. ఆ హీరో ఎవరో కాదు ప్రముఖ బాలీవుడ్‌ హీరో గొవిందా (Govinda).
అవును బాలీవుడ్‌లో ఒకానొక సమయంలో స్టార్‌గా గుర్తింపు తెచ్చుకున్నాడు గోవిందా (Govinda). పైన చెప్పినట్లుగా ఆయన నటన, గ్రేస్‌ డ్యాన్స్‌, కామెడీ టైమింగ్ బాలీవుడ్‌లో ఇంకెవరికీ ఉండేవి కావు. అయితే ఆయన గత కొన్నేళ్లుగా సినిమాలకు దూరంగా ఉంటున్నాడు. ఆ మధ్య ప్రమాదవశాత్తు గన్‌ పేలి గాయపడ్డాడు కూడా. ఆ విషయం వదిలేస్తే అలాంటి గొవిందా (Govinda) పరిస్థితి ఇలా అయిపోవడం ఏంటి అనే ప్రశ్న చాలామందిలో ఉంది. హీరోగా కాకపోయినా క్యారెక్టర్‌ ఆర్టిస్ట్‌గా అయినా చేయొచ్చు.
గొవిందా (Govinda) కెరీర్‌ ఉన్నట్టుండి నాశనం కావడంపై నిర్మాత పహ్లాజ్ నిహలానీ కీలక వ్యాఖ్యలు చేశారు. చుట్టూ ఉన్న వారి మాటలు వినడం వల్లే గొవిందా కెరీర్‌ నాశనమైందని చెప్పుకొచ్చారాయన. గోవిందా (Govinda) కెరీర్‌ ఆరంభంలో ఎన్నో విజయాలు అందుకున్నాడు. అయితే అతను ఎదుటి వ్యక్తులను సులభంగా నమ్మేస్తుంటాడు. అందుకే కెరీర్‌లో ఆయనకు ఈ పరిస్థితి ఎదురైంది. జ్యోతిషులు, పండితుల మాటలను ఎక్కువగా నమ్ముతుండేవాడు. ఆ కారణంగా ఆయన కెరీర్‌పై తీవ్ర ప్రభావం పడింది అని పహ్లాజ్ చెప్పారు.
గోవిందా (Govinda) ‘మహాభారత్‌’ సీరియల్‌లో అభిమన్యుడి పాత్ర కోసం మొదటిసారి ఆడిషన్‌ ఇచ్చారు. ఆ తర్వాత ఖుష్బూతో (Khushbu) ‘తాన్‌ బదన్‌’ (Tan-Badan) అనే సినిమాతో ఇండస్ట్రీలోకి వచ్చారు. ఆ సినిమా విజయం సాధించడంతో వరుస అవకాశాలు వచ్చాయి. 1991లో అమితాబ్‌ (Amitabh Bachchan), రజనీకాంత్‌ (Rajinikanth) లతో కలసి ‘హమ్‌’ (Hum) సినిమా చేశారు. ఆ తర్వాత ఆయన చాలా ఏళ్లపాటు వెనక్కి తిరిగి చూసుకోలేదు. ఆరేళ్ల క్రితం ‘రంగీలా రాజ్‌’గా వచ్చారు. ఆ సినిమా మళ్లీ ఇటువైపు చూడలేదు.
