మెగా స్టార్ అమితాబ్ బచ్చన్ తో కలిసి ‘బుడ్డా తేరా హోగా బాప్’ రూపొందించి బాలీవుడ్ లో ఎంట్రీ ఇచ్చిన పూరిజగన్నాథ్ మరోసారి అమితాబ్ తో కలిసి పనిచేయనున్నారు. ఈసారి అమితాబ్ బచ్చన్, అభిషేక్ బచ్చన్ లతో కలిసి ఓ చిత్రాన్ని తెరకెక్కించనున్నాడట. దీనిపై బాలీవుడ్ వర్గాలు పూరిని సంప్రదించగా ‘ అవును. ఇటీవలే రామ్ గోపాల్ వర్మ ఆఫీసు లో అమితాబ్ ను కలిశాను.
చాలాకాలం తరువాత బాలీవుడ్ చిత్రానికి దర్శకత్వం వహించాలనుకుంటున్నాను. అమితాబ్, అభిషేక్ లతో కలిసి ఈసారి పనిచేయాలనుకుంటున్నాను. త్వరలోనే మంచి కథతో వారిని కలుస్తాన’ని తెలిపాడు. ఈ చిత్రం 2017 లో సెట్స్ పైకి వెళ్ళే అవకాశం ఉందని ఆయన ఆశాభావం వ్యక్తం చేశారు. ప్రస్తుతం రోగ్ చిత్రీకరణలో బిజీగా ఉన్న పూరి.. మే 25 నుంచి ప్రారంభం కానున్న కళ్యాణ్ రామ్ చిత్రానికి దర్శకత్వం వహించనున్నాడు.
