ఖాళీని పూరించడానికి పూరి ఏం చేస్తున్నాడో తెలుసా..?

సాధారణంగా సినీ పరిశ్రమలో హిట్ పడగానే బిజీ అయిపోతుంటారు. ప్లాప్ రాగానే కొన్నాళ్ళు పక్కకొచ్చేస్తుంటారు. దీంతో వారికి తెలీకుండానే కొంత ఖాళీ ఏర్పడుతుంటుంది. ఇది ఎవరికైనా వర్తిస్తుందేమో కానీ డాషింగ్ డైరక్టర్ పూరి విషయంలో మాత్రం చెల్లదంటే చెల్లదు. కారణం ఆయన ఖాళీ అన్న మాటను ఎప్పటికప్పుడు సినిమాతో పూరించేస్తుండడమే. మహేశ్, అల్లు అర్జున్, ప్రభాస్, రవితేజ వంటి స్టార్స్ తో సినిమాలు చేసిన పూరి నితిన్, వరుణ్ తేజ్ మీడియం రేంజ్ హీరోలతోనూ సినిమాలు చేశారు. మొన్నామధ్య ఛార్మి తో ‘జ్యోతిలక్ష్మి’ లాంటి చిన్న సినిమాని చేశారు. ఇటీవల ‘ఇజం’ సినిమాని ప్రేక్షకుల ముందుంచిన పూరి ఇప్పుడు మరో చిన్న సినిమా చేసే ఆలోచనలో ఉన్నారట.

‘ఇజం’ తర్వాత పూరి-మహేశ్ కలయికలో తెరకెక్కనున్న మూడో సినిమా ‘జనగణమన’ మొదలవ్వాల్సి ఉంది. అయితే మహేశ్ మురుగదాస్ సినిమాలో బిజీగా ఉండటంతోపాటు పూరి సినిమాపై తుది నిర్ణయం వెల్లడించలేదట. అటు ఎన్టీఆర్ కూడా పూరితో సినిమా చేసేందుకు సిద్ధంగా లేడు. బన్నీ మాట సరేసరి. చిరు సంగతి తెలిసిందే. ఇక మిగిలింది రవితేజ. అయితే మాస్ రాజా సినిమా లోకాన్ని వదిలి విదేశీ విహారాల్లో మునిగి ఉన్నాడు.

పనిచేయనోళ్లు చావండని నిర్దాక్షిణ్యంగా చెప్పే పూరి తాను మాత్రం పని లేకుండా ఎందుకుంటాడు. అందుకని నాగశౌర్య లాంటి చిన్న హీరోలతో ఓ సినిమా చేసి ఈ ఖాళీని పూడ్చేద్దామని యోచనలో ఉన్నారట. నాగశౌర్య లాంటి హీరోకి పూరి అవకాశం అంటే పెద్దదే. అంచేత నో అనే అవకాశం లేదు. ఇక నిర్మాణం విషయానికొస్తే ఈ సినిమా కోసం తాను సమర్పకుడిగా ఉంటూ కొందరు స్నేహితులని నిర్మాతలుగా మార్చేస్తున్నాడట. సో.. ఎట్ ఎనీ టైమ్ పూరి కొత్త సినిమా ప్రకటన రావచ్చు. యధావిధిగా రెండు మూడు నెలల్లో ఈసినిమా చుట్టేసి వెంటనే దోస్త్ రవితేజతో తర్వాతి సినిమా చేయనున్నాడు పూరి.