రాజ్ తరుణ్.. మారుతి సినిమా ఏమైనట్టు..?

కొద్ధిరోజుల క్రితం మారుతి కథ, స్క్రీన్ ప్లే అందిస్తున్న సినిమాలో రాజ్ తరుణ్ హీరోగా నటిస్తున్నట్టు ప్రచారం జరిగిన విషయం విదితమే. ‘రాజుగాడు – యమ డేంజర్’ అన్న పేరుతో ఈ సినిమా పూజ కార్యక్రమాలు కూడా జరిగాయి. ఏకే ఎంటర్టైన్మెంట్స్ సంస్థ నిర్మించనున్న ఈ సినిమాతో సంజన రెడ్డి అనే లేడీ డైరక్టర్ పరిచయమవనున్నారు. ముందుగా మారుతి నిర్మాణ భాగస్వామిగా ఉంటాడన్న ప్రచారమూ జరిగింది కానీ మారుతి తప్పుకున్నాడు. అయితే ఇప్పుడు మరో మెలిక కూడా పెట్టాడట.

తొలుత కథ, స్క్రీన్ ప్లే ఇస్తానన్న మారుతి ఇప్పుడు కథ మాత్రమే ఇస్తా స్క్రిప్ట్ గా మార్చుకొమ్మని అంటున్నాడట. దానికి కారణం హవీష్ తో తన దర్శకత్వంలోని సినిమాని త్వరగా పట్టాలెక్కించాలనుకోడమే. దాంతో ఈ చిత్రం ఆలస్యమవుతుందని వినికిడి. మరో విషయమేమిటంటే రాజ్ తరుణ్ ఈ నిర్మాణ సంస్థతో మూడు సినిమాలకు ఒప్పందం కుదుర్చుకున్నాడట. అందులో ఒకటి వంశీకృష్ణ (దొంగాట ఫేమ్)తో చేస్తున్నది చివరిదశకు చేరుకుంది. నవంబర్లో విడుదలకు సిద్ధమవుతోంది. తర్వాత మారుతి కథతో మొదలవ్వాల్సి ఉంది. ఇది ప్రశ్నార్థకంగా మారడంతో మూడో సినిమాని ముందుకు తీసుకొచ్చారట. రచయిత వెలిగొండ శ్రీనివాస్ ఈ సినిమాతో మెగాఫోన్ పట్టనున్నారు. వీటితోపాటు సుకుమార్ అందించిన కథతో 14 రీల్స్ సంస్థలోను రాజ్ తరుణ్ ఓ సినిమా చేయనున్నాడు.