విజ‌య్ దేవ‌ర కొండ, రీతూవ‌ర్మ జంటగా నటించిన “పెళ్లి చూపులు” సినిమా ప్రముఖుల ప్రశంసలు అందుకుంటోంది. తరుణ్ భాస్కర్ దర్శకత్వంలో రూపుదిద్దుకున్న ఈ చిత్రం జూలై 29న విడుదలై మంచి చిత్రంగా గుర్తింపు తెచ్చుకుంది. రాజ్ కందుకూరి(ధ‌ర్మ ప‌థ క్రియేష‌న్స్‌), య‌ష్ రంగినేని(బిగ్ బెన్ సినిమాస్‌) సంయుక్తంగా నిర్మించిన ఈ మూవీని ప్రముఖ నిర్మాత డి. సురేష్‌బాబు సమర్పించారు.
యూత్ ఫుల్ ఎంటర్టైనర్ గా వచ్చి ఫ్యామిలీ ఆడియన్స్ ని కట్టి పడేస్తున్న ఈ సినిమాను మొన్న నిర్మాత, నటి లక్ష్మి ప్రసన్న ప్రశంసించగా, నిన్న నటుడు దగ్గుబాటి రానా అభినందనలతో ముంచెత్తాడు. ఈ రోజు దర్శకధీరుడు ఎస్.ఎస్. రాజమౌళి పెళ్లిచూపులు బృందానికి శుభాకాంక్షలు తెలిపారు. జక్కన్న ఆదివారం ఈ చిత్రాన్ని చూసి తన స్పందనను సోషల్ మీడియా వేదికగా వెల్లడించారు. “పెళ్లి చూపులు సినిమాను బాగా ఎంజాయ్ చేసాను. కథ, కథనం కూర్చోబెట్టాయి. కొత్త అనుభూతిని కల్పించింది. తొలి ప్రయత్నంలోనే తరుణ్ భాస్కర్ మంచి ఫిలింని అందించారు.
విజ‌య్, రీతూవ‌ర్మలు ఫ్రెష్ లుక్ ని తీసుకొచ్చారు. ఈ చిత్ర బృందానికి అభినందనలు. థియేటర్ల సంఖ్య పెరగాలని కోరుకుంటున్నాను” అని పోస్ట్ చేశారు. సంగీత దర్శకుడు వివేక్ సాగ‌ర్, సినిమాటోగ్రాఫర్ నాగేష్ లు చిత్ర విజయంలో ప్రముఖ పాత్ర వహించారు.
