సిక్స్ ప్యాక్ చూపించనున్న రామ్ చరణ్

తెలుగు చిత్ర పరిశ్రమలో హీరోల మధ్య ఆరోగ్యకరమైన పోటీ ఉంటుంది. ఒకరి రికార్డును మరొకరు అధిగమించడానికి నిత్యం ప్రయత్నిస్తూనే ఉంటారు. టెంపర్ సినిమాలో ఎన్టీఆర్ షర్ట్ విప్పి కండలు చూపించారు. అందుకు పోటీగా ధృవ సినిమాలో రామ్ చరణ్ సూపర్ ఫిట్ బాడీ ని చూపించారు. వీరిద్దరూ కలిసి రాజమౌళి సినిమాలో కలిసి నటిస్తున్నప్పటికీ పోటీ తీవ్రత కొంచెం కూడా తగ్గలేదు. ఎన్టీఆర్ ప్రస్తుతం త్రివిక్రమ్ శ్రీనివాస్ దర్శకత్వంలో “అరవింద సమేత వీర రాఘవ” అనే చిత్రాన్ని చేస్తున్నారు. ఈ సినిమా ఫస్ట్ లుక్ లో ఎన్టీఆర్ సిక్స్ ప్యాక్ బాడీతో ఆకట్టుకున్నారు. సినిమాపై అంచనాలు పెంచారు. దీంతో రామ్ చరణ్ కూడా రంగస్థలం సినిమా తర్వాత బోయపాటి శ్రీను దర్శకత్వంలో చేస్తున్న చిత్రం కోసం సిక్స్ ప్యాక్ బాడీని రప్పించడానికి రంగంలోకి దిగారు.

బాలీవుడ్ కండల వీరుడు సల్మాన్ ఖాన్ ని వ్యక్తిగత ట్రైనర్ గా వ్యవహరించే రాకేష్ ఉడియార్ నేతృత్వంలో సాధన మొదలెట్టారు. బోయపాటి సినిమా అనగానే యాక్షన్ సీన్స్ ఓ రేంజ్ లో ఉంటాయి. అతని రేంజ్ కి మెగా హీరో రేంజ్ కలవనుంది. సో ఇంకా యాక్షన్ సీక్వెన్స్ లలో ట్రాన్స్ఫార్మర్స్ పగిలిపోవాల్సిందే. అంతలా హై ఓల్టేజ్ ఫైట్స్ ఉండనున్నాయి. డీవీవీ దానయ్య నిర్మిస్తున్న ఈ సినిమా ప్రస్తుతం బ్యాంకాక్ లో షూటింగ్ జరుపుకుంటోంది. ఈ భారీ షెడ్యూల్ లో హీరోయిన్ కైరా అద్వానీ కూడా పాల్గొంటోంది. రాక్ స్టార్ దేవీ శ్రీ ప్రసాద్ సంగీతమందిస్తున్న ఈ సినిమా రాజవంశస్థుల నేపథ్యంలో సాగనుంది. రంగస్థలం తర్వాత చెర్రీ చేస్తున్న ఈ చిత్రంపై సహజంగానే భారీ అంచనాలు నెలకొని ఉన్నాయి.