అమర్‌ అక్బర్‌ ఆంటోనీ స్టోరీని మహేష్ రిజక్ట్ చేశారా ?

స్టార్ డైరక్టర్ శ్రీను వైట్ల ప్రస్తుత పరిస్థితి బాగాలేదు గానీ మొదట్లో అన్ని విజయాలే. అందుకే సూపర్ స్టార్ మహేష్ బాబు పిలిచి అవకాశం ఇచ్చారు. ఇద్దరి కాంబినేషన్లో దూకుడు వచ్చింది. ఇండస్ట్రీ హిట్ గా నిలిచింది. అదే నమ్మకంతో మహేష్ శ్రీను వైట్లకి మరో అవకాశం ఇచ్చారు. ఈసారి శ్రీను వైట్ల గురి తప్పింది. ఆగడు మూవీ ఆకట్టుకోలేకపోయింది. దీంతో శ్రీను వైట్లతో మరోసారి మూవీ చేయకూడదని మహేష్ గట్టిగా అనుకున్నారు. శ్రీను వైట్ల మాత్రం మహేష్ తో ఎలాగైనా మూవీ చేయాలనీ భావించారు. మంచి కథ రాసుకొని మహేష్ కి వినిపించారు. ఆయన ఒకసారి కమిట్ అయితే తన మాట తనే వినరు. అందుకే సింపుల్ గా నో చెప్పారు.

ఇంకా చేసేది లేక రవితేజకి ఆ కథ చెప్పి ఒప్పించారని ఫిలింనగర్ వాసులు చెబుతున్నారు. అదే అమర్‌ అక్బర్‌ ఆంటోనీ. ఇందులో రవితేజ మూడు షేడ్స్ తో అలరించనున్నారు. ఈ సినిమాతో ఇలియానా రీ ఎంట్రీ ఇస్తోంది. కిక్ సినిమాతో కిక్ ఇచ్చిన జంట మళ్ళీ ఇందులో ఆకట్టుకోనుంది. అలాగే స్టార్ కమెడియన్ సునీల్ ఈ చిత్రంలో ఫుల్ లెంగ్త్ కామెడీ రోల్ చేయనున్నారు. అంతేకాదు ఈ చిత్రంలో చైల్డ్ ఆర్టిస్ట్ లుగా నిన్నటితరం హీరోయిన్ లయ కుమార్తె శ్లోక, రవితేజ తనయుడు మహాధన్ కనిపించనున్నారు. మైత్రి మూవీ మేకర్స్ వారు ఎక్కడా కాంప్రమైజ్ కాకుండా నిర్మిస్తున్న ఈ సినిమాతో హిట్ ట్రాక్ లోకి రావాలని శ్రీను వైట్ల చూస్తున్నారు.