RC15: శంకర్ టీమ్ తో దిల్ రాజుకి సమస్య!

October 4, 2022 / 12:43 PM ISTByFilmy Focus

Join Us

దర్శకుడు శంకర్ తో సినిమా చేయాలనుకున్న దిల్ రాజు ‘ఇండియన్ 2’ సినిమాను నిర్మించడానికి రెడీ అయ్యారు. లైకా ప్రొడక్షన్స్ తో కలిసి సినిమాను నిర్మించాలనుకున్నారు. కానీ కొన్ని కారణాల వలన దిల్ రాజు ఈ సినిమా నుంచి తప్పుకున్నారు. ఆ తరువాత సినిమా షూటింగ్ కూడా ఆగింది. శంకర్ కి నిర్మాతలకు మధ్య విబేధాలు రావడంతో విషయం కోర్టు వరకు వెళ్లింది. ఫైనల్ గా ఇష్యూని పరిష్కరించుకొని ‘ఇండియన్2’ సినిమా షూటింగ్ మొదలుపెట్టారు శంకర్.

ఈ కథ పక్కన పెడితే.. రామ్ చరణ్ హీరోగా ఓ సినిమా అనుకున్న శంకర్ దానికి నిర్మాతగా దిల్ రాజు ఉండాలని.. ఆయన దగ్గరకు వెళ్లి మరీ కథ ఓకే చేయించుకున్నారు. ప్రాజెక్ట్ ఓకే చేసుకున్నప్పుడే శంకర్ ని బడ్జెట్ గురించి అడిగి ఓ నెంబర్ ఫిక్స్ చేసుకున్నారు దిల్ రాజు. దానికి తగ్గట్లుగా కొన్ని డీల్స్ కూడా చేసుకున్నారు. కానీ ఇప్పుడు బడ్జెట్ కు మించి ఖర్చవుతుందట.

సినిమా షూటింగ్ 50 శాతం పూర్తికాకముందే అనుకున్న బడ్జెట్ మొత్తం అయిపోయిందట. దీనికి కారణాలు చాలానే ఉన్నాయి. శంకర్ స్పెషల్ గా ప్రొడక్షన్ టీమ్ ను కోలీవుడ్ నుంచి రప్పించుకున్నారట. ఈ విషయం దిల్ రాజుకి నచ్చకపోయినా రాజీ పడిపోయారట. కానీ ఇప్పుడు బడ్జెట్ తో పాటు కొన్ని విషయాలు తన చేదాటిపోతుండడం దిల్ రాజుకి నచ్చడం లేదట.

ఇప్పటివరకు చరణ్ సినిమా నెక్స్ట్ షెడ్యూల్ గురించి శంకర్ చెప్పడం లేదట. మొదట సెప్టెంబర్ లో మొదలుపెట్టాలనుకున్నారు కానీ శంకర్ ‘ఇండియన్ 2’ సినిమాతో బిజీ అయ్యారు. ఇలా డిలే చేస్తుండడంతో దిల్ రాజు వడ్డీల భారం కూడా ఎక్కువైందని తెలుస్తోంది. ప్రతి సినిమా విషయంలో పక్కా లెక్కతో ఉండే దిల్ రాజుకి ఈ సినిమా విషయంలో మాత్రం ఆ లెక్క తప్పుతుందట.