నానికి మొదలైన టైటిల్ ప్రోబ్లమ్స్, ఎలా బయటపడతాడో చూడాలి

ఏ సినిమాకైనా రిలీజ్ కి ముందు కష్టాలు ఎదురవ్వడం అనేది సర్వసాధారణం. చిరంజీవి లాంటి మెగాస్టార్ నటించిన సినిమా కూడా విడుదల కష్టాలు ఎదుర్కొన్న సందర్భాలు కోకొల్లలు. అయితే.. అవన్నీ ఆర్ధిక ఇబ్బందులు లేదా సెన్సార్ ఇష్యూస్. కానీ.. విచిత్రంగా నాని సినిమా టైటిల్ కారణంగా ముందుగా ప్లాన్ చేసుకొన్న ఆగస్ట్ నెలలో విడుదల కాలేకపోతుంది. అందుకు కారణం ఏంట్రా అంటే.. ఆల్రెడీ “గ్యాంగ్ లీడర్” అనే టైటిల్ ను ఒక మెగా అభిమాని రిజిష్టర్ చేసుకోవడమే కాదు..

ఏకంగా షూటింగ్ కూడా మొదలెట్టేసి ఆగస్ట్ 22న చిరంజీవి పుట్టినరోజు నాడు విడుదల చేయడానికి సన్నాహాలు చేసుకొన్నాడు. రిలీజయ్యే థియేటర్లు తక్కువైనా.. రిలీజ్ మాత్రం కన్ఫర్మ్. ఫిలిమ్ ఛాంబర్ రూల్స్ ప్రకారం ఒకే టైటిల్ కి పైనో, కిందో ఏదో ఒక ట్యాగ్ లైన్ తగిలించుకొని రిజిష్టర్ చేయించుకోవడం తప్పేమీ కాకపోయినా.. సదరు ఒకే టైటిల్ తో రూపొందిన సినిమాలు ఒకేవారం లేదా ఒకే నెలలో విడుదలవ్వకూడదు. ఆ కారణంగా నాని “గ్యాంగ్ లీడర్” సినిమా ఆగస్ట్ లో విడుదలవ్వడం కష్టమయ్యేలా ఉంది.

ఇకపోతే.. ఇటీవల విడుదలైన “ఏజెంట్ సాయి శ్రీనివాస ఆత్రేయ” సినిమా మూలకథతో “గ్యాంగ్ లీడర్” చిత్రానికి పోలికలు ఉన్న కారణంగా కొన్ని సన్నివేశాలు రీషూట్ చేస్తున్నారనే గాసిప్పులు కూడా గట్టిగా వినిపిస్తున్నాయి. ఒకవేళ అదే గనుక నిజమైతే.. నాని స్వయంగా ఆగస్ట్ రేస్ నుంచి తప్పుకోన్నట్లే అవుతుంది.