అజిత్ పక్కన నో చెప్పిన సాయి పల్లవి

“ప్రేమమ్” అనే ఒక్క మలయాళీ  సినిమాతో దక్షిణాది సినీ వర్గాలను తన వైపు తిప్పుకున్ననటి సాయి పల్లవి. ఇందులో నటనకు మెచ్చి ఆమెను అనేక అవకాశాలు తలుపు తట్టాయి. వైద్య విద్య పరీక్షలు ఉండడంతో వాటన్నిటిని సున్నితంగా తిరస్కరించింది. పవర్ స్టార్ పవన్ కళ్యాణ్ సరసన అవకాశాన్ని సైతం వదులుకుంది. స్టడీ పూర్తి చేసి ప్రస్తుతం మెగా హీరోతో తెలుగు తెరకు పరిచయం కానుంది.

క్లాస్ సినిమాల దర్శకుడు శేఖర్ కమ్ముల దర్శకత్వంలో మెగా ప్రిన్స్ వరుణ్ తేజ్ హీరోగా తెరకెక్కనున్న “అమెరికా అబ్బాయి.. తెలంగాణ అమ్మాయి” లో హీరోయిన్ గా సైన్ చేసింది. ఈ మూవీ త్వరలో సెట్స్ మీదకు వెళ్లనుంది. అయితే ఆమె గురించి తాజా సమాచారం ఒకటి బయటికి వచ్చింది. తమిళ హీరో అజిత్ “తల 57” సినిమాలో ప్రత్యేక పాత్రలో నటించమని ఆ చిత్ర బృందం సాయి పల్లవిని సంప్రదించగా, డేట్స్ ఖాళీ లేవని ఆమె రిజెక్ట్ చేసినట్లు తెలిసింది.

శివ దర్శకత్వంలో వస్తున్న “తల 57″లో ముందుగా అనుష్కను ప్రధాన హీరోయిన్ గా అనుకున్నారు. ఆమె బిజీ కావడంతో కాజల్ ను తీసుకున్నారు. అందులోమరో హీరోయిన్ కోసం సాయి పల్లవిని అడిగారు. గతవారం షూటింగ్ ప్రారంభమైన ఈ చిత్రానికి వచ్చేనెలలో డేట్స్ కేటాయించాలి. అదే సమయంలో శేఖర్ కమ్ముల సినిమా చిత్రీకరణ జరుగుతుంది. కావున సాయి పల్లవి మంచి అవకాశాన్ని వదులుకుంది.