మరో లేడీ ఓరియెంటెడ్ చిత్రానికి ఓకే చెప్పిన సమంత!

సినిమా రంగంలో హీరోయిన్స్ కంటే హీరోలకే కష్టం ఎక్కువ. నష్టం ఎక్కువ. అందుకే పారితోషికం కూడా ఎక్కువ తీసుకుంటుంటారు. సినిమా హిట్ అయినా.. ఫ్లాప్ అయినా దాని ప్రభావం ఎక్కువగా ఉండేది హీరోపైనే. హీరోయిన్స్ ఆడుతూ పాడుతూ సినిమాని కంప్లీట్ చేసేస్తుంటారు. అలాగే మొన్నటి వరకు సమంత కమర్షియల్ సినిమాల్లో హీరోయిన్ గా నటించి మంచి క్రేజ్ తెచ్చుకుంది. నాగ చైతన్యతో పెళ్లి అయిన తర్వాత రిస్క్ తీసుకోవడానికి ఆసక్తి కనబరుస్తోంది. లేడీ ఓరియెంటెడ్ సినిమాలను చేయడానికి ముందుకు వస్తోంది. సినిమా భారాన్ని తానొక్కతే మోయడానికి సై అంటోంది. కన్నడ లో హిట్ సాధించిన లేడీ ఓరియెంటెడ్ మూవీ యూ టర్న్ నచ్చడంతో ఈ సినిమాని తెలుగులో తమిళంలో చేస్తోంది. కన్నడలో తెరకెక్కించిన పవన్ కుమార్ ఈ వెర్షన్స్ ని డైరక్ట్ చేస్తున్నారు.

ఈ సినిమాలో సమంత నటన ఎలా ఉంటుందో చూడాలని సినీ విశ్లేషకులు ఎదురుచూస్తున్నారు. అయితే ఈ చిత్రం రిలీజ్ కాకముందే మరో లేడీ ఓరియెంటెడ్ సినిమాకి సమంత గ్రీన్ సిగ్నల్ ఇచ్చినట్లు ఫిలిం నగర్ వాసులు చెప్పారు. అర్జున్ రెడ్డిని అద్భుతంగా తెరకెక్కించిన సందీప్ వంగా టీమ్ లో పనిచేసిన గిరీశయ్యా చెప్పిన కథ నచ్చడంతో ఆమె  ఓకే చెప్పినట్లు సమాచారం. ఆగస్టులో మొదలు కానున్న ఈ చిత్రం ఇతర లేడీ ఓరియెంటెడ్ సినిమాలకు విభిన్నంగా మొదటి నుంచి చివరి వరకు వినోదాన్ని పంచనుందని తెలిసింది. ఈ సినిమా గురించి మరిన్ని వివరాలు త్వరలో అధికారికంగా ప్రకటించనున్నారు.