ప్రముఖ కథానాయిక సమంత (Samantha), సోషల్‌ మీడియా వైరల్ స్టార్‌ ఉర్ఫీ జావెద్‌ (Urfi Javed).. మంచి స్నేహితులు. ఈ విషయాన్ని ఇటీవల ఉర్ఫీనే చెప్పింది. అయితే తమ స్నేహం బయట కాదని, కేవలం ఇన్‌స్టాగ్రామ్‌లోనే అని చెప్పింది. తాజాగా ఇద్దరి మధ్య జరిగి సోషల్‌ మీడియా ముచ్చట్లు ఆసక్తి రేకెత్తిస్తున్నాయి. దీనిని చూసిన నెటిజన్లు ఇదో రకం స్నేహం, అభిమానం అని కామెంట్లు చేస్తున్నారు. హిందీ ‘బిగ్‌బాస్‌’లో ఓ సీజన్‌లో పాల్గొని నటి ఉర్ఫీ జావేద్‌ సోషల్‌ మీడియాలో వైరల్‌గా మారింది.
ఆ తర్వాత ఆమె డ్రెస్సింగ్‌ విషయంలో రోజుకో ఫొటో బయటకు వస్తూ వైరల్ అవుతోంది. ఈ క్రమంలో కొన్ని విమర్శలు కూడా ఎదుర్కొంది. మధ్యలో ఆమె చేసిన వేధింపుల ఆరోపణలు కూడా చాలానే ఉన్నాయి. ఇవన్నీ పక్కన పెడితే.. తాజాగా ఉర్ఫీ మీద సమంత (Samantha) ప్రశంసలు కురిపించింది. సోషల్‌ మీడియాలో సమంత ఈ మేరకు పోస్ట్‌ పెట్టింది. దానికి ఉర్ఫీ కూడా స్పందించింది. ‘‘ఇవి భావోద్వేగ క్షణాలు. రాత్రంతా కంటతడి పెట్టుకుంటానేమో.
సపోర్ట్‌ చేయడంలో మీలాంటి మహిళను నేను ఇప్పటి వరకూ చూడలేదు సమంత’’ అంటూ ఉర్ఫీ జావెద్‌ సమంత పోస్టుకు రిప్లై ఇచ్చింది. అంతలా సమంత ఎందుకు రియాక్ట్‌ అయింది అంటూ ఆమె సోషల్‌ మీడియా హ్యాండిల్‌ను జనాలు తెగ వెతికేస్తున్నారు. ఇంతకీ ఏమైందంటే ‘ఫాలో కర్‌లో యార్‌’ అనే రియాలిటీ షోలో వ్యక్తిగత, వృత్తిగత విషయాలు గురించి ఉర్ఫీ మాట్లాడింది. చిత్ర పరిశ్రమలో తనకు మద్దతు ఇచ్చే స్నేహితులు ఎవరూ లేరని చెప్పింది.
ఆ కార్యక్రమాన్ని చూసిన సమంత (Samantha) ఉర్ఫీ ధైర్య సాహాసాలను మెచ్చుకుంటూ సోషల్‌ మీడియాలో ఓ పోస్ట్‌ పెట్టింది. ‘‘మన జీవితం గురించి చెప్పడానికి ధైర్యం కావాలి. నువ్వు అదృష్టవంతులైతే గౌరవంతో పాటు ప్రశంసలు వస్తాయి. అందరూ నీ ప్రయాణాన్ని గౌరవిస్తారు. లేదంటే గేళి చేస్తారు. ఇప్పుడే కెరీర్‌ ఆరంభించారు. ఇలాగే కొనసాగించండి’’ అంటూ సమంత పోస్టు చేసింది.
