Chiranjeevi, Venkatesh: వెంకీతో చిరు సినిమా… ఆ హీరోయిన్‌ ఫిక్సా?

January 25, 2022 / 01:53 PM ISTByFilmy Focus

Join Us

Chiranjeevi, Venkatesh: వెంకీతో చిరు సినిమా… ఆ హీరోయిన్‌ ఫిక్సా?

చిరంజీవి – త్రిష… టాలీవుడ్‌లో ఇదో ఫ్లాప్‌ కాంబో. ‘స్టాలిన్‌’ సినిమాలో ఈ ఇద్దరూ కలసి నటించారు. అందులో చిరు సరసన త్రిష అంతగా నప్పలేదు అనే విమర్శలు అయితే వచ్చాయి. అయితే ఆ తర్వాత చాలా సినిమాల్లో ఈ ఇద్దరి కాంబోను చూపించడానికి దర్శకులు ప్రయత్నాలు చేశారు. కానీ ఏవీ వర్కౌట్‌ కాలేదు. అన్నీ అనుకొని సినిమా సెట్స్‌కి వెళ్లే ముందు, సెట్స్‌కి వెళ్లిన తర్వాత కూడా ఆమె తప్పుకుంది. తాజాగా మరోసారి చిరు – త్రిష కాంబినేషన్‌ని వెండితెరపై మరోసారి చూపించడానికి ప్రయత్నాలు జరుగుతున్నాయట.

చిరంజీవి రీఎంట్రీ నుండి వరుస సినిమాలు చేస్తూ ఉన్నారు. ఈ క్రమంలో కుర్ర దర్శకులకు అవకాశాలు ఇస్తున్నారు. అయితే చిరంజీవికి హీరోయిన్‌ని వెతకడం కాస్త కష్టమే అవుతోంది. ప్రతి సినిమాకి ముందు కథానాయిక ఎవరు? అంటూ పెద్ద చర్చే సాగుతుంది. అలా ప్రతిసారి వినిపించే పేర్లలో త్రిష పేరు కూడా ఉంటుంది. చిరు కొత్త సినిమా అనగానే ‘త్రిష నాయికగా చేస్తుంది’ అంటూ ఓ రూమర్‌ లేస్తుంది. అయితే అదే స్పీడులో ‘ఆమె నటించడం లేదు’ అంటూ క్లోజ్‌ అయిపోతుంది. తాజాగా వెంకీ కుడుముల సినిమాకు త్రిష పేరు వినిపిస్తోంది.

చిరంజీవితో వెంకీ కుడుముల ఓ ఫ్యామిలీ ఎంటర్‌టైనర్‌ను సిద్ధం చేస్తున్న విషయం తెలిసిందే. ఇటీవలే ఈ సినిమాను అఫీషియల్‌గా అనౌన్స్‌ చేశారు. అప్పటికే సినిమా పాయింట్‌ చెప్పి ఓకే చేసుకున్న వెంకీ… ఇప్పుడు కథను పూర్తి స్థాయిలో సిద్ధం చేసే పనిలో పడ్డారట. ఈ క్రమంలో ఇందులో హీరోయిన్‌ ఎవరు అనే ప్రశ్న మొదలైంది. దాంతో సీనియర్‌ నాయికల పేర్లు వరుసపెడుతున్నారట. నయనతార, కాజల్‌, తమన్నా, శ్రుతి హాసన్‌, త్రిష అంటూ పేర్లు చూస్తుంటే త్రిష పేరు దగ్గర ఆగారట.

నిజానికి ‘ఆచార్య’ సినిమాలోనే త్రిషను తీసుకుందాం అనుకున్నారు. కానీ ఆమె అప్పుడు నో అంది అని టాక్‌. అంతకుముందు కూడా ఓ సినిమా విషయంలో ఇంచుమించు ఇలాగే జరిగింది. మరోవైపు నయనతారను కమర్షియల్‌ హీరోయిన్‌ పాత్రకు ఒప్పించడం కష్టం. కాజల్‌ ఇప్పుడు నటించదు. తమన్నా, శ్రుతి హాసన్ ప్రస్తుతం చిరంజీవితో నటిస్తున్నారు. కాబట్టి త్రిష పేరు చర్చకు వచ్చిందట. మరి త్రిష ఒప్పుకుంటుందా లేదా అనేది చూడాలి.