‘ఇరుముడి’.. ఈ టైటిల్ లీక్ అయినప్పటి నుండి, ఆ తర్వాత కొన్ని లుక్స్ బయటకు వచ్చినప్పటి నుండి అందరిలోనూ ఉన్న డౌట్. ఈ సినిమా కథేంటి. రవితేజ ఏమన్నా డివోషనల్ సినిమా చేస్తున్నాడా? శివ నిర్మాణ విషాధ ప్రేమకథల నుండి ఇటు వైపు వచ్చేశారా అనే డౌట్ కూడా కలిగింది. దానికి కారణం టైటిల్, రవితేజ లుక్ అన్నమాట. ఇప్పుడు ఈ రూమర్లన్నిటికీ ఫుల్ స్టాప్ పెట్టేశారు దర్శకుడు శివ నిర్వాణ. ఈ మేరకు ఆయన సినిమా నేపథ్యం గురించి చెప్పుకొచ్చారు.
‘ఇరుముడి’ సినిమా నుండి ఇప్పటివరకు వచ్చిన ప్రచార చిత్రాల్లో ఎక్కువ శాతం రవితేజ అయ్యప్ప మాలలో కనిపించారు. లేదంటే తాగుడుకు బాగా అలవాటు పడిన వ్యక్తిగా కనిపించాడు. ఈంతో ఈ సినిమా కథపై సోషల్ మీడియాలో రకరకాల వార్తలు వచ్చాయి. శబరిమల బ్యాక్డ్రాప్లో ఈ సినిమా రానుందని ప్రచారం మొదలైంది. అయితే శబరిమల దేవాలయానికి ఈ సినిమాకు ఎలాంటి సంబంధం లేదని శివ నిర్వాణ స్పష్టం చేశారు.
సినిమాలో కథానాయకుడి జీవితంలో 41 రోజుల అయ్యప్ప దీక్ష ఒక భాగం మాత్రమే. దీక్షా కాలంలో అయ్యప్ప భక్తులు తమ నియమావళి, అలవాట్ల విషయంలో నిష్టగా ఉంటారు. వ్యసనాలు ఉన్న ఒక వ్యక్తి ఈ దీక్ష తీసుకుంటే, అతడు మద్యానికి దూరంగా ఉండాల్సి వస్తుంది. అక్కడే కథలో సంఘర్షణ మొదలవుతుంది. హీరో పాత్రలో మలుపు కోసం కఠినమైన నియమాలు ఉండాలి కాబట్టే అయ్యప్ప స్వామి దీక్ష నేపథ్యాన్ని ఎంచుకున్నాను అని చెప్పారు.
అంతే తప్ప ఈ సినిమా శబరిమలకు సంబంధించిన కథ కాదని తేల్చి చెప్పారు. 41 రోజుల కథే స్క్రీన్ప్లేకి ప్రధాన బలం. ఆ దీక్షకు ముందు ఏం జరిగింది.. దీక్షలో ఉన్న సమయంలో ఏం జరిగిందనే విషయాలు ఆసక్తికరంగా ఉంటాయి. రవితేజకు జోడీగా ప్రియా భవానీ శంకర్ నటించిన ఈ సినిమాను ఆగస్టు 21న ప్రేక్షకుల ముందుకు తీసుకురావాలని చూస్తున్నారు.
