త్రివిక్రమ్, సుజీత్ లకు లార్గో వించ్ డైరెక్టర్ జెరోమీ పంచ్ లు!

అది జనవరి 10, 2018. పవర్ స్టార్ పవన్ కళ్యాణ్ నటించిన “అజ్ణాతవాసి” విడుదలై డిజాస్టర్ గా నిలిచింది అనే వార్తకంటే.. సదరు సినిమా “లార్గో వించ్” అనే హాలీవుడ్ చిత్రానికి ఫ్రీమేక్ అని తెలియడం, సదరు హాలీవుడ్ సినిమా దర్శకుడు జెరోమీ “అజ్ణాతవాసి” సినిమాను అక్కడ చూసి “ఇది నా సినిమాకు కాపీయే.. సరిగా తీయలేదు” అని ట్వీట్ చేయడం పవన్ ఫ్యాన్స్ ను గట్టిగా బాధించింది. అదంతా గతం ఇప్పుడు ఎందుకు గుర్తు చేస్తున్నావయ్యా అని తిట్టుకోకండి.. ఇప్పుడు మళ్ళీ అదే సీన్ రిపీట్ అయ్యింది.

“సాహో” సినిమా విడుదలై.. మిక్స్డ్ టాక్ సొంతం చేసుకొన్నా.. సూపర్ హిట్ కలెక్షన్స్ తో దూసుకుపోతున్నప్పటికీ.. ఈ సినిమా మూల కథ కూడా “లార్గో వించ్” నుండి లేపేశాడనే టాక్ ఫస్ట్ షో నుంచి వస్తూనే ఉంది. ఈ విషయమై మళ్ళీ సదరు దర్శకుడు జెరోమీ స్పందించాడు. ఈసారి కేవలం స్పందించడమే కాక “తెలుగు దర్శకులారా.. “సాహో” కూడా నా సినిమా కాపీయే.. కనీసం కాపీ అయినా సరిగా కొట్టండి” అని ట్వీట్ చేయడం ప్రభాస్ ఫ్యాన్స్ ను బాగా డిస్టర్బ్ చేసింది. సాహో మూల కథ కాపీ అనేది నిజమే అయినప్పటికీ.. జెరోమీ ఇలా ట్వీట్ చేయడాన్ని మాత్రం తెలుగు సినిమా అభిమానులు, ముఖ్యంగా ప్రభాస్ అభిమానులు జీర్ణించుకోలేకపోతున్నారు.