ఆ ప్రశ్నకు సమాధానం చెప్పడానికి ఇష్టపడని శ్రద్ధ కపూర్

బాలీవుడ్ బ్యూటీ శ్రద్ధ కపూర్ తెలుగు తెరకు ప్రభాస్ సాహో సినిమా ద్వారా పరిచయం కాబోతోంది. సుజీత్ దర్శకత్వంలో రూపుదిద్దుకుంటోన్న ఈ మూవీ వేగంగా షూటింగ్ జరుపుకుంటోంది. యువీ క్రియేషన్స్ బ్యానర్లో వంశీ, ప్రమోద్ లు ఏకకాలంలో తెలుగు, తమిళం, హిందీ భాషలో నిర్మిస్తున్నారు. ఇందుకోసం భారీ స్టెంట్స్ చేయడానికి కూడా శ్రద్ధ కపూర్ వెనుకాడడం లేదు. అయితే సాహో చిత్రం కంటే ముందే తెలుగు స్టార్ బ్యాడ్మింటన్‌ ప్లేయర్‌ సైనా నెహ్వాల్‌ బయోపిక్‌లో నటించడానికి శ్రద్ధా కపూర్‌ సంతకం చేసింది. ఆ మూవీ ఇంకా సెట్స్ మీదకు వెళ్ళలేదు. అయితే ఆ చిత్రం ఆగిపోయిందని పుకార్లు షికార్లు చేస్తున్నాయి.

దీని గురించి శ్రద్ధ ని అడగగా.. ఆమె ఇలా స్పందించారు. ‘‘ప్రస్తుతం నేను “సాహో” సినిమాతో బిజీగా ఉన్నాను. నేను నటిస్తోన్న హిందీ సినిమా ‘స్త్రీ’ షూటింగ్‌ చందేరిలో జరుగుతోంది. నా కెరీర్‌లో ఫస్ట్‌ టైమ్‌ చేస్తోన్న హారర్‌ సినిమా ఇది. అందువల్ల సైనా నెహ్వాల్‌ బయోపిక్‌ ప్రారంభం ఆలస్యం అవుతోంది. ఆ సినిమా తప్పకుండా సెట్స్‌పైకి వెళుతుంది.’’ అని శ్రద్ధా కపూర్‌ వెల్లడించారు. ఇక ఆమె కో స్టార్ ప్రభాస్ గురించి చెప్పమని కోరగా… ‘‘ప్రభాస్‌ సూపర్‌ యాక్టర్‌ మాత్రమే కాదు.. మంచి హ్యూమన్‌ బీయింగ్‌’’ అన్నారు. మరి.. ప్రభాస్‌ పెళ్లి గురించి మీకేమైనా తెలుసా? అని అడగ్గా.. ‘‘నాకు తెలీదు. ఈ ప్రశ్న ప్రభాస్‌నే అడగండి’’ అని నవ్వుతూ సమాధానమిచ్చారు.