ఇప్పుడు యూట్యూబ్లో, మ్యూజిక్ స్ట్రీమింగ్ ప్లాట్ఫామ్స్లో మారుమోగుతున్న పాట ‘హల్లల్లల్లో..’. ‘పెద్ది’ సినిమాలోని ఈ పాటలో రామ్చరణ్, శ్రుతి హాసన్, జాన్వీ కపూర్ ఎనర్జిటిక్ మూమెంట్స్ వేసి చార్ట్ బస్టర్గా మార్చారు. ఇలాంటి చార్ట్ బస్టర్ సాంగ్ని పాడింది ఎవరో తెలుసుకోవాలిగా. ఆమెనే రక్షితా సురేశ్. పేరు ఎక్కడో విన్నట్లుగా ఉంది కదా. నిజమే ఎందుకంటే ఎప్పటి నుండో రక్షిత పాటలు పాడుతోంది. అయితే ఇలాంటి ఐటెమ్ సాంగ్ పాడటం ఆమెకు కొత్తే.
మైసూరుకు చెందిన రక్షిత సినిమా జర్నీ ప్రయాణం తెలుగు పాటతోనే ప్రారంభమైంది. లెజెండరీ సంగీత దర్శకుడు ఇళయరాజా స్వరకల్పనలో సినిమా సంగీత అరంగేట్రం చేశారు. ‘ఎవడే సుబ్రహ్మణ్యం’ సినిమాలోని ‘చల్లగాలి తాకుతున్న మేఘమైనదీ మనసిలా..’ ఆమె తొలి పాట. ఆ తర్వాత ‘లవ్స్టోరీ’లోని ‘ముత్యాల చెమ్మ చెక్క..’ పాటను ఆలపించింది. ‘జవాన్’లోని ‘నాట్ రామయ్యా వస్తావయ్యా..’, ‘ది లెజెండ్’లోని ‘తొలి తొలి ఆశల ఊసులే..’ తెలుగు వెర్షన్ల పాటను పాడింది. ఎక్కువగా హిప్హాప్ తమిళ, జీవీ ప్రకాశ్కుమార్, యువన్ శంకర్రాజా లాంటి తమిళ సంగీత దర్శకుల సినిమాల్లో గాయనిగా రాణించింది.
ప్రముఖ సంగీత దర్శకుడు ఏఆర్ రెహమాన్తో రక్షితకు ప్రత్యేక అనుబంధం ఉంది. ‘మిమీ’ సినిమాతో ఈ ఇద్దరి కాంబో మొదలైంది. ‘లైఫ్ ఆఫ్ ముత్తు’, ‘కోబ్రా’, ‘పొన్నియిన్ సెల్వన్’, ‘పొన్నియిన్ సెల్వన్ 2’, ‘మామన్నన్’, ‘ఆడు జీవితం’, ‘థగ్లైఫ్’ సినిమాల్లోనూ రక్షిత పాటలు పాడారు. అంతేకాదు ఆయన కాన్సర్ట్ల్లోనూ పాడతుంటారామె. సినిమాల్లోకి రాకముందు కూడా రక్షిత స్టారే. కన్నడలో ‘రిథమ్ తధీమ్’, ‘లిటిల్ స్టార్ సింగర్ 2009’ కార్యక్రమాల్లో టైటిల్ గెలుచుకుంది. ఆ తర్వాత తమిళంలో ‘సూపర్ సింగర్ 6’ ఫస్ట్ రన్నరప్గా నిలిచింది.
సినిమా పాటలతోపాటు సింగిల్స్ కూడా పాడుతుంటారు రక్షిత సురేశ్. ‘దట్స్ హౌ వీ రోల్’, ‘పానీ పూరీ’, ‘బియట్టా యతి’, ‘ఆశై అలయ్ మీరుదయి’, ‘కరుప్పళగి’, ‘అయ్యో ప్లాస్టిక్’ లాంటి సింగిల్ ఆల్బమ్ సాంగ్స్ కూడా పాడారు రక్షిత.
