సూపర్ స్టార్ మహేష్ బాబు తనయుడు గౌతమ్ కృష్ణ తొలి చిత్రంతోనే నంది అవార్డు అందుకుంటే.. అతని చెల్లెలు సితార క్రేజీ పనులతో చిన్నప్పుడే వార్తల్లో నిలుస్తోంది. మహేష్ ముద్దుల కూతురు చేసే ఆ క్యూట్ పనులు అందరినీ ఆకట్టుకుంటున్నాయి. గత ఏడాది వేసవి సెలవుల్లో మట్టితో కుండలు చేయడం, కిచెన్ లోకి వెళ్లి చాకోలెట్ కేక్ సిద్ధం చేయడం.. వంటి వీడియోలు సోషల్ మీడియాలో విహారం చేశాయి. స్టార్ హీరో, హీరోయిన్లకు వచ్చే వ్యూస్ వచ్చాయి. ఆ వీడియోలు తీసి పోస్ట్ చేసిన నమ్రతకు మంచి ఉత్సాహాన్నిచ్చాయి. అందుకే గౌతమ్, సితార కు సంబందించిన ఫోటోలు, వీడియోలు తరచూ షేర్ చేస్తోంది.
తాజాగా బొమ్మ పట్టుకొని ఉన్న సితార ఫోటోని పోస్ట్ చేసింది. ఇందులో స్పెషాలిటీ ఏమిటంటే బొమ్మకు ఉన్న డ్రస్ ని స్వయంగా సితారనే రెడీ చేసిందంట. ఈ విషయం తెలిసిన మహేష్ అభిమానులు సితారని మెచ్చుకోకుండా ఉండలేకపోతున్నారు. బుల్లి ఫ్యాషన్ డిజైనర్ అంటూ అభినందిస్తున్నారు. ప్రస్తుతం మహేష్, నమ్రత పిల్లలు డిస్నీల్యాండ్‌, టుమారోల్యాండ్, హాలీవుడ్‌ స్టూడియోలను చుట్టేసి హైదరాబాద్ కి వచ్చే పనిలో ఉన్నారు. మహేష్ ఇంటికి రాగానే కొరటాల శివ దర్శకత్వంలో చేస్తున్న భరత్ అనే నేను మూవీ షూటింగ్ లో పాల్గొననున్నారు.
