సినిమాల విషయంలో లేదు లేదు అంటూ ఆ సినిమాలో యాక్ట్‌ చేయడానికి ఒప్పుకున్న హీరోయిన్లను చాలామందిని చూశాం. రెమ్యూనరేషన్‌ లెక్కలో, లేక డేట్స్‌ లెక్కలో తేలేంతవరకు సినిమా విషయం చెప్పరు. అయితే ఇటీవల కాలంలో రిలేషన్లు, పెళ్లి గురించి కూడా ఆఖరి వరకు చెప్పడం లేదు మన హీరోయిన్లు. ఒకవేళ విషయం లీక్‌ అయ్యి ఆ హీరోయిన్‌నో, తండ్రినో అడిగితే.. ‘మీరే పెళ్లి చేసేస్తారా? చేసేయండి’ అంటూ వెటకారంగా మాట్లాడతారు. ఆఖరికి లీక్‌ ప్రకారం పెళ్లి అయిపోతుంది.
తాజాగా ఇలాంటి పరిస్థితే ఏర్పడింది బాలీవుడ్‌ బ్యూటీ సోనాక్షి సిన్హా (Sonakshi Sinha) విషయంలో. సోనాక్షి సిన్హా – జహీర్‌ ఇక్బాల్‌ (Zaheer Iqbal) పెళ్లి చేసుకోబోతున్నారంటూ గత కొన్ని రోజులుగా జోరుగా టాక్‌ నడిచిన సంగతి తెలిసిందే. ఇద్దరూ ఇప్పటివరకూ ఈ విషయంలో స్పందించలేదు. అయితే సోనాక్షి – ఇక్బాల్‌ల పెళ్లి ఆదివారం జరగనుందని తెలిసింది. ఈ నేపథ్యంలో ముంబయిలోని సోనాక్షి ఇంట్లో మెహందీ వేడుక నిర్వహించారట.
వేడుకకు సంబంధించిన ఫొటోలు ప్రస్తుతం సోషల్‌ మీడియాలో వైరల్‌గా మారాయి. ఇరు కుటుంబాలు, కొద్దిమంది అతిథులు ఈ వేడుకకు హాజరైనట్లు తెలుస్తోంది. అయితే ఇప్పటివరకు ఇరు కుటుంబాల నుండి ఎలాంటి అధికారిక సమాచారం అయితే లేదు. ‘డబుల్‌ ఎక్స్‌ఎల్‌’ అనే సినిమాలో కలసి నటించినప్పుడు ఇక్బాల్‌, సోనాక్షి మధ్య స్నేహం ఏర్పడిందట. ఆ తర్వాత అది ప్రేమగా మారిందట. కొన్నాళ్ల ప్రేమబంధం తర్వాత పెళ్లి బంధానికి సిద్ధమయ్యారు ఇప్పుడు.
అయితే ఇటీవల పెళ్లి గురించి సోనాక్షి తండ్రి శత్రుఘ్న సిన్హా స్పందించారు. ‘‘ఇది నా కుమార్తె జీవితం. ఆమె అంటే ప్రేమ చాలా ఉంది. తప్పకుండా తన పెళ్లికి వెళ్తా’’ అని అన్నారు. అయితే ఆయనే గతంలో పెళ్లి గురించి తనకు తెలియదు అని చెప్పారు. ఆ తర్వాత అయితే అవుతుంది, అన్నీ పిల్లలు మనకు చెప్పి చేస్తున్నారా? అంటూ మరో ప్రశ్న కూడా వేశారు. అయితే ఎక్కడా పెళ్లి గురించి అధికారికంగా ఆయన చెప్పలేదు. కట్‌ చేస్తే ఇప్పుడు మెహందీ అయిపోయింది.
