Sri Chidambaram Garu Review in Telugu: శ్రీ చిదంబరం గారు సినిమా రివ్యూ & రేటింగ్!

తన లోపాన్ని నల్ల కళ్లద్దాల వెనుక దాచిపెట్టి, తన బాధను గుండెల్లో అదిమిపెట్టి బ్రతికేస్తుంటాడు. అయితే.. తాను ప్రేమించిన అమ్మాయి కూడా తన లోపాన్ని వేలెత్తి చూపడం తట్టుకోలేక.. ఎలాగైనా తన మెల్లకన్నును సరి చేసుకోవాలని ఏవేవో పిచ్చి ప్రయత్నాలు మొదలెడతాడు. ఈ క్రమంలో సోలోమన్ తెలుసుకున్న జీవిత సత్యం ఏమిటి? అనేది “శ్రీ చిదంబరం గారు” కథాంశం.

నటీనటుల పనితీరు: నటుడిగా వంశీ ఎక్కువ కష్టపడినప్పటికీ.. సంధ్య ఎక్కువ మార్కులు సంపాదించుకుంది. క్రిస్టియన్ లుక్స్ మొదలుకొని గోదావరి యాస వరకు అన్నీ చాలా నీట్ గా వర్కవుట్ చేసుకుంది సంధ్య. ముఖ్యంగా ఎమోషనల్ సీన్స్ లో ఆమె నటన పతాక స్థాయిలో ఉంది.

వంశీ కూడా మెల్లకన్ను పెట్టి నటించడం ఎంతో కష్టమైనా.. నేర్పుతో చేశాడు. తనలోని లోపం తాలూకు బరువును గుండెల్లో మోస్తూ, పైకి మామూలుగా ఉండే సన్నివేశాల్లో ఎమోషన్ ను అద్భుతంగా పండించాడు.

గోపీనాథ్ లిమిటెడ్ సీన్స్ అయినప్పటికీ.. ఉన్నంతలో చక్కగా నవ్వించాడు. ఇంకొన్ని సన్నివేశాలు ఉంటే బాగుండు అనిపించింది.

తల్లి పాత్రల్లో కల్పలత, తులసిలు చాలా సహజంగా ఒదిగిపోయారు.

సాంకేతికవర్గం పనితీరు: చందు-రవిల పాటలు ఎంత స్పష్టంగా, వినసొంపుగా, హాయిగా ఉన్నాయో.. సినిమాతో సంబంధం లేకుండా అలా వాళ్ల పాటలు కానీ నేపథ్య సంగీతం కానీ వింటూ కూర్చుండిపోవచ్చు. ముఖ్యంగా కీరవాణి పాడిన వెళ్లే దారిలోన పాట అర్థవంతంగా, కథా గమనానికి అద్దం పట్టింది. పాటల్లో సాహిత్య సంపద ముచ్చటగా ఉంది.

రామ్ సినిమాటోగ్రఫీ వర్క్ అద్భుతంగా ఉంది. ప్రతి ఫ్రేమ్ ను చాలా చక్కగా చెక్కాడు. సినిమా మూడ్ కి తగ్గట్లుగా కలర్ టోన్ ని డిజైన్ చేసుకున్న తీరు బాగుంది. పుల్లంగి లాంటి లొకేషన్ దొరకడం, దాన్ని చక్కగా సద్వినియోగపరుచుకోవడం ప్రశంసార్హం. అలాగే.. కాస్త కష్టతరమైన సింక్ సౌండ్ ను కూడా బాగా మ్యానేజ్ చేసారు. అందువల్ల సినిమా చాలా ఆర్గానిక్ గా ఉంటుంది.

దర్శకుడు వినయ్ రత్నం ఎంచుకున్న కథలో నావెల్టీ ఉంది. అయితే.. కథనంలో, ముఖ్యంగా సెకండాఫ్ లో ఎమోషన్ లోపించింది. మరీ ముఖ్యంగా.. హీరో తన లోపాన్ని రియలైజ్ అవ్వడానికి, తనకంటే పెద్ద లోపం ఉన్న మనిషి జీవితాన్ని చూపించడం అనే జస్టిఫికేషన్ సహజంగా లేదు. చిన్న చిన్న సందర్భాలు, సన్నివేశాలు ఎంతో హృద్యంగా రాసుకున్న విజయ్.. కీలకమైన కాన్ఫ్లిక్ట్ పాయింట్ ని పేలవంగా డీల్ చేసిన విధానం సినిమాకి మైనస్ గా మారింది.

అలాగే.. సీన్ కంపోజిషన్ విషయంలో ఇమ్మెచ్యురిటీ కనిపిస్తుంది. డ్రామాను రాసుకోవడంలో, దాన్ని ఎస్టాబ్లిష్ చేసుకోవడంలో ఇంకాస్త పరిణితి అవసరం. అయితే.. దర్శకుడిగా అతడి వద్ద చాలా ఫ్రెష్ థాట్స్ ఉన్నాయి. వాటిని సరిగ్గా ఛానలైజ్ చేసుకోవాలి. ఓవరాల్ గా.. వినయ్ రత్నంని ఒక మంచి ఒరిజినల్ టాలెంట్ గా అంగీకరించవచ్చు కానీ.. ఇంకాస్త ఇంప్రూవ్మెంట్ అవసరం.

విశ్లేషణ: సహజత్వం చాలా అందంగా ఉంటుంది. అయితే.. ఆ సహజత్వానికి సరైన స్థాయి భావోద్వేగం మేళవించినప్పుడే కంటెంట్ పూర్తిస్థాయిలో పండి.. ప్రేక్షకులకి ఒక చక్కని సినిమాటిక్ ఎక్స్ పీరియన్స్ ఇస్తుంది. ఈ విషయంలో వినయ్ రత్నం & టీమ్ కాస్త తడబడ్డారు. మంచి కాన్ఫ్లిక్ట్ పాయింట్ రాసుకొని, రియలైజేషన్ పాయింట్ ఇంకాస్త సెన్సిబుల్ గా డీల్ చేసి ఉంటే.. “శ్రీ చిదంబరం గారు” కచ్చితంగా తెలుగు టాప్ సినిమాల్లో ఒకటిగా నిలిచేది. అది లోపించడంతో ఓ సగటు సింపుల్ సినిమాగా మిగిలిపోయింది.

ఫోకస్ పాయింట్: సహజత్వంలో భావోద్వేగం కొరవడింది!

రేటింగ్: 2.5/5