టాలీవుడ్లో ఒక సినిమా సక్సెస్ అయితే ఆ డైరెక్టర్ రేంజ్ హైలో ఉంటుంది. కానీ వయసు పెరిగే కొద్దీ క్రియేటివిటీ తగ్గుతుందనేది ఇక్కడ చాలా మంది నమ్మే మాట. 60 ఏళ్లు దాటితే చాలు, సీనియర్ డైరెక్టర్లు చేసే సినిమాలు అర్థం కాక ఆడియన్స్ తలలు పట్టుకున్న సందర్భాలు ఎన్నో ఉన్నాయి. అయితే ఈ రూల్స్ ఏవీ తనకు వర్తించవని నిరూపిస్తున్నారు లెజెండరీ డైరెక్టర్ సింగీతం శ్రీనివాసరావు. 94 ఏళ్ల వయసులో ఆయన మళ్ళీ ‘యాక్షన్’ చెప్పబోతుండటం ఇప్పుడు ఇండస్ట్రీలో హాట్ టాపిక్గా మారింది.
SSR61
పుష్పక విమానం, ఆదిత్య 369, భైరవద్వీపం వంటి క్లాసిక్స్తో తెలుగు సినిమా స్థాయిని పెంచిన ఈ మేధావి, ఇప్పుడు తన 61వ చిత్రం SSR61 కోసం సిద్ధమయ్యారు. ఫిబ్రవరి మొదట్లో ఈ సినిమాకు సంబంధించిన అధికారిక ప్రకటన వెలువడింది. ఈ వయసులోనూ ఆయనకు ఉన్న సినిమా ప్యాషన్ను చూసి సినీ లోకం ఆశ్చర్యపోతోంది. హాలీవుడ్లో క్లింట్ ఈస్ట్వుడ్ లాంటి దర్శకులు 90ల్లో కూడా ఆస్కార్ రేంజ్ సినిమాలు తీస్తుంటారు. ఇప్పుడు సింగీతం కూడా అదే బాటలో నడుస్తూ ఇండియన్ ఫిల్మ్ మేకర్స్కు ఒక గట్టి సందేశాన్ని ఇస్తున్నారు.
ఈ ప్రతిష్టాత్మక చిత్రాన్ని ‘కల్కి 2898 AD’ డైరెక్టర్ నాగశ్విన్ నిర్మిస్తుండటం విశేషం. వైజయంతీ మూవీస్ బ్యానర్పై వస్తున్న ఈ సినిమాకు రాక్ స్టార్ దేవి శ్రీ ప్రసాద్ సంగీతం అందిస్తున్నారు. ఈ కాంబినేషన్ చూస్తుంటే ఇది కేవలం ఒక సినిమా మాత్రమే కాదు, ఒక గొప్ప ఎక్స్పెరిమెంట్ అని అర్థమవుతోంది. డీఎస్పీ లాంటి ఎనర్జిటిక్ కంపోజర్తో సింగీతం జతకట్టడం ఈ ప్రాజెక్ట్పై అంచనాలను అమాంతం పెంచేసింది. ప్రస్తుతం ఈ మూవీ ప్రీ ప్రొడక్షన్ పనులు శరవేగంగా జరుగుతున్నాయి.
నిజానికి సింగీతం శ్రీనివాసరావు 60 ఏళ్ల వయసులో ‘భైరవద్వీపం’ లాంటి విజువల్ వండర్ను సృష్టించారు. ఇప్పుడు 94 ఏళ్లలో ఆయన ఎలాంటి సబ్జెక్ట్ను ఎంచుకున్నారనేది అందరిలోనూ ఆసక్తిని రేకెత్తిస్తోంది. కొత్త నటీనటులతో ఈ సినిమాను తెరకెక్కించే అవకాశం ఉన్నట్లు తెలుస్తోంది. సినిమా మేకింగ్లో టెక్నాలజీ మారినా, కథను చెప్పే విధానంలో ఆయన విజన్ ఇప్పటికీ నేటి తరం దర్శకులకు పాఠం లాంటిదే. ఈ సినిమా గనుక బాక్సాఫీస్ వద్ద క్లిక్ అయితే, రిటైర్మెంట్ గురించి ఆలోచించే ఎందరో సీనియర్లకు ఇదొక బిగ్ లెసన్ అవుతుంది.
