దేశంలోకి టెన్నిస్‌ కొత్తగా రాలేదు. అయితే అమ్మాయిలు టెన్నిస్‌ ఆడాలి? అనే ఉద్యమం తీసుకొచ్చింది మాత్రం సానియా మీర్జా అనే చెప్పాలి. అలా అని ఆమె చైతన్య వేదికలు ఏర్పాటు చేసి చెప్పలేదు. తాను ఆడింది, అందరూ ఆడండి అని పిలుపిచ్చింది. అయితే అంతకుముందు ఆమె జీవితం అంత సాఫీగా లేదు. పెళ్లి, కెరీర్‌, ఇప్పుడు అన్నింటా ఓ సినిమా లాంటి కథే ఆమె జీవితం. అందుకే ఆమె లైఫ్‌ను సినిమాగా తీయాలని చాలా రోజుల నుండి చర్చలు ఉన్నాయి.
తాజాగా ఆమె బయోపిక్‌ గురించి ఆసక్తికర చర్చ సాగింది. నెట్‌ఫ్లిక్స్‌లో ప్రసారమవుతున్న ఓ టాక్‌ షోకి ఆమె హాజరైంది. ఈ క్రమంలో బయోపిక్స్‌ గురించి డిస్కషన్‌ వచ్చినప్పుడు ఆమె పాత్రలో ఎవరు నటిస్తే బాగుంటుంది అని హోస్ట్‌ అడిగితే సానియా మీర్జా ఆసక్తికర కామెంట్స్‌ చేసింది. తన బయోపిక్‌లో నటించడానికి ఎవరైనా ఓకే అని చెప్పిన సానియా.. మన దేశంలో ఈ పాత్ర చేయడానికి చాలామంది హీరోయిన్లు ఉన్నారు అని తేల్చేసింది.
అయితే, సానియా బయోపిక్‌లో ఆమె ప్రేమికుడిగా నటించడానికి తాను సిద్ధం అని గతంలో షా రుఖ్‌ ఖాన్‌ (Shah Rukh Khan) చెప్పిన మాటను హోస్ట్‌ గుర్తు చేయగా.. అదే జరిగితే తన జీవిత కథలో ఆ పాత్రను తానే చేస్తాను అని సానియా మీర్జా చెప్పేసింది. అంతేకాదు షా రుఖ్‌ ఖాన్‌ లేదా అక్షయ్‌ కుమార్‌ ఎవరు నటించినా తన పాత్ర తానే చేస్తాను అని క్లారిటీ ఇచ్చేసింది. అంటే ఆమె యాక్టింగ్‌లోకి రావడానికి సిద్ధమైంది అన్నమాట.
టెన్నిస్‌లో ఓ వెలుగు వెలిగిన సానియా మీర్జా.. పాకిస్థాన్‌ క్రికెటర్‌ షోయబ్‌ మాలిక్‌ను పెళ్లి చేసుకొని కొన్నేళ్ల తర్వాత విడాకులు ఇచ్చేసిన విషయం తెలిసిందే. ఆయన ఇప్పుడు పాకిస్థాన్‌ నటి సనా జావెద్‌ను మూడో పెళ్లి చేసుకున్నాడు. ఇక ప్రస్తుతం సానియా మీర్జా సింగిల్‌ మదర్‌. లైఫ్‌లో మరో అడుగు ముందుకేస్తుందో లేదో చూడాలి.
