యూట్యూబ్‌లో సిరీస్‌లు, కాన్సెప్ట్‌ వీడియోలు చేసుకుంటూ.. మంచి నటుడిగా పేరు తెచ్చుకున్నాడు సుహాస్ (Suhas) . ఇతనిలో ఫైర్‌ ఉంది, మీ నటన అదిరిపోతుంది అంటూ చాలామంది అతనికి చెప్పుంటారు. అయితే ‘కలర్‌ ఫొటో’తో (Colour Photo) అతను హైలైట్‌ అయ్యాక… ఆ సినిమాకు నేషనల్‌ అవార్డు వచ్చాక ఇంకా పేరొచ్చేసింది. చిరంజీవి లాంటి స్టార్‌ హీరోనే పేరు పెట్టి.. గుర్తు పట్టి… ప్రతిభనను పొగిడారు. ఇవన్నీ కలిసొచ్చాయో ఏమో.. సుహాస్ ఇప్పుడు వరుస సినిమాలు చేస్తున్నాడు.
అవును సుహాస్ చేతిలో ఇప్పుడు ఆరేడు సినిమాలు ఉన్నాయి. తాజాగా మరో సినిమా కూడా మొదలైంది. దీంతో దశ తిరగడం అంటే ఇదీ అంటూ నెటిజన్లు కామెంట్లు పెడుతున్నారు. సుహాస్ అనే న‌టుడిని మొద‌ట్లో చూస్తే కామెడీ వేషాల‌కు త‌ప్ప వేరే వాటికి సూట్ కాడు అనిపించేలా సినిమాల ఎంపిక ఉడేది. ఆ తర్వాత అనుకోకుండా హీరో అయ్యాడు. ఆ తర్వాత విలన్‌ అయ్యాడు. అలా వెర్సటైల్‌ నటుడిగా పేరు తెచ్చుకున్నాడు.
లీడ్ రోల్స్‌లో వ‌రుస‌గా మంచి సినిమాలు ఓకే చేసుకుంటూ ముందుకెళ్తున్నాడు. ఇలా ఎన్ని చేసినా నటనా ప్రాధాన్యం ఉండేలానే చూసుకుంటున్నాడు. ‘రైట‌ర్ ప‌ద్మ‌భూష‌ణ్‌’(Writer Padmabhushan) , ‘అంబాజీ పేట మ్యారేజీ బ్యాండు’తో (Ambajipeta Marriage Band) వచ్చి ఆకట్టుకున్న సుహాస్… ఇప్పుడు కొత్త సినిమాలు ఓకే చేసి, చక చకా షూటింగ్‌లు ప్రారంభిచేస్తున్నాడు. ఆల్రెడీ పూర్తిచేసిన, మేకింగ్ ద‌శ‌లో ఉన్న సినిమాలు రిలీజ్‌కు లైన్‌ కడుతున్నాయి. ‘ప్ర‌స‌న్న వ‌ద‌నం’ (Prasanna Vadanam) సినిమా వేస‌వి విడుద‌ల‌కు సిద్ధ‌మైంది.
కొత్త‌గా ‘శ్రీరంగ‌నీతులు’ (Sriranga Neethulu) సినిమా కూడా విడుద‌ల‌కు సిద్ధ‌మ‌వుతోంది. ఇక ఈ మ‌ధ్యే కీర్తి సురేష్ (Keerthy Suresh) జోడీగా అమెజాన్ ప్రైమ్ కోసం ఓ సినిమా చేయబోతున్నట్లు ప్రకటించారు. సందీప్ రెడ్డి బండ్ల అనే కొత్త ద‌ర్శ‌కుడితో ఓ సినిమా ఉంది. రామ్ గోదాల అనే కొత్త ద‌ర్శ‌కుడితో ‘ఓ భామ అయ్యో రామ’ అనే సినిమాను ఇటీవల ప్రారంభించారు. త‌మిళ సినిమా ‘జో’తో అంద‌రి దృష్టిని ఆకర్షించిన మాళ‌విక మ‌నోజ్ ఈ సినిమాలో నాయిక.
