రోజుకో కథ చెప్పమని మాటల మాంత్రికుడిని అడిగిన సునీల్

మాటల మాంత్రికుడు త్రివిక్రమ్ శ్రీనివాస్ ప్రస్తుతం తన దగ్గరికొచ్చే నిర్మాతలకు కండిషన్లు పెట్టే స్థాయిలో ఉన్నారు. కానీ అతనికే కండిషన్లు పెట్టిన ఘనుడు ఒకరున్నారు. అతనే హాస్యనటుడు, హీరో సునీల్. త్రివిక్రమ్, సునీల్ సినిమాల్లో అవకాశం కోసం తిరిగే రోజుల్లో ఒకే రూమ్ లో కలిసి ఉండేవారు. అప్పటి నుంచి ఇప్పటివరకు వారి మధ్య స్నేహబంధం చెక్కు చెదరలేదు. ఒక్క ఛాన్స్ కోసం ఎదురు చూసే సమయంలో జరిగిన సంగతులను ఈ మధ్య ఓ షో లో సునీల్ గుర్తుకు తెచ్చుకున్నారు. “అప్పుడు మాకు చాల ఫ్రీ టైమ్ ఉండేది. అందుకే ప్రతిరోజూ ఒక కథ చెప్పాల్సిందేనని షరతు పెట్టేవాణ్ణి.

నేను త్రివిక్రమ్ కి పెట్టిన కండిషన్లో ఇది ఒకటి మాత్రమే” అని సునీల్ వివరించారు. “వారం రోజుల్లో కథ చెప్పమని ఓ నిర్మాత నుంచి త్రివిక్రమ్ కి అవకాశం వచ్చింది. అప్పుడు అతను చాలా నార్మల్ గా ఉండేవాడు. టీవీ చూస్తూ జాలీగా గడిపేవాడు. నాకు కంగారు వచ్చేది. ఎలా చెబుతాడేమోనని. అందుకే కథ చెప్పడానికి వెళ్లే ముందు రోజు టీవీ కట్టేసి నాకు ముందు స్టోరీ చెప్పమని అడిగాను. మూడు గంటల్లో చాలా తేలికగా నాకు సినిమా చూపించాడు.” అని ఆనాటి రోజుల్లోకి వెళ్లారు. మాటల మాంత్రికుడితో కలిసి చేసిన ప్రయాణం చేసిన రోజులే తన జీవితంలో ఉత్తమమైనదని సునీల్ వెల్లడించారు.